‘मगरात’ नां तयेत मगःतय् ज्ञापन

येँ – नेपाल मगर संघं प्रदेश नं. ५ नां ‘मगरात स्वायत्त प्रदेश’ तयेमाःगु माग यासें मुख्यमन्त्री शंकर पोखरेलयात ११ लाख हस्ताक्षर लःल्हाःगु दु । प्रदेश ५ य् मगः समुदायया जनसंख्या दकलय् अप्वः दुगु व आदिमकालीन नां तकं जूगुलिं ‘मगरात’ नां तयेत माग यानागु खँ नेपाल मगर संघया केन्द्रीय अध्यक्ष नवीन रोका मगरं कनादीगु दु ।

संघं रुकुम पूर्वनिसें पाल्पा तकया मगः समुदायया सघन वस्ती दुगु क्षेत्रयात कःघानाः मगरात स्वायत्त क्षेत्र घोषणा यायेमाःगु माग याःगु दु । संघं संविधानय् स्वायत्त क्षेत्रत दयेके फइगु खँ न्ह्यथनातःगु दु धासें थःपिनिगु मागयात सम्बोधन मयात धाःसा कडा आन्दोलन यायेगु ख्याच्वः नं बिउगु दु ।

ज्ञापन पौ लःल्हाना कासें मुख्यमन्त्री पोखरेलं नां व राजधानीया विषयय् प्रदेशसभां सुझाव संकलन याःगु धासें आः हे छुं धाये मफइगु प्रतिक्रिया बियादीगु दु । वय्कलं प्रदेशया नामाकरणय फुकसिया पहिचान व मनोभावनायात थुइकाः हे यायेगु खँ कनादिल ।

मुख्यमन्त्री पोखरेलं प्रदेश ५ य् थारू व मगः समुदायया बाहुल्यता दुगुलिं प्रादेशिक विदाय् माघी पर्वयात नं दुथ्याकूगु खँ कनादिल । म्हिगः तःधंगु ल्याखय् मगः समुदाय हस्ताक्षर सहित नारा थ्वयेकाः मुख्यमन्त्रीया ज्याकुथी वंगु खः ।

सम्बन्धित बुखँ

LEAVE YOUR COMMENTS