अनलाइन कारोबारं छेँ बरः तयेत समस्या

येँ – भूमिसुधार तथा व्यवस्था मन्त्रालयं छेँबुँ न्याये मीगु माःगु लिखत आः अनलाइनपाखें डाउनलोड यानाः बुझे याःसां जिउगु व्यवस्था यायेवं बैंकय् बरः तयाः कारोबार यायेत समस्या जूगु दु । अनलाइनपाखें भरे यायेगु व्यवस्था लिपा छेँ बुँ न्याये मीत समस्या मदुसां बैंकय् बरः तयेत धाःसा समस्या जुयाच्वंगु खँ नां कने चाहे मजूम्ह छम्ह बैंक म्यानेजरं ‘नेपालभाषा टाइम्स’यात कनादीगु दु ।

वय्कःया कथं अनलाइनय् दृष्टिबन्धक यायेगु व्यवस्था मदुगुलिं थज्याःगु समस्या वःगु खः । वय्कलं धयादी, ‘अनलाइन भरे यायेगु फारामय् छेँ बुँ न्यायेगु कोलम दु, तर दृष्टिबन्धक यायेगु कोलम मदु । थुकिं यानाः स्वीकृत जुइधुंकूगु त्यासा नं निकासा याये फयाच्वंगु मदु ।’ थुगु समस्या समाधान यायेत थीथी बैंकया छगू पुचलं भूमिसुधार मन्त्रालय मालपोत कार्यालयलिसे सहलह यानाच्वंगु जानकारी बिसें याकनं थ्व समस्या समाधान जुइगु आशा नं वय्कलं प्वंकादिल ।

अथेहे वय्कलं आः तत्काल त्यासा बीगु प्रक्रिया दिनाच्वंगु धासें त्यासा बीत माःगु ध्यबा बैंकय् मदयाः समस्या वयाच्वंगु जानकारी नं बियादिल । मेखे राष्ट्र बैंकं धाःसा बजारय् पर्याप्त मात्राय् पुँजी दुगु धासें पुँजीया समस्या मदुगु खँ धाःगु दु । उखे बैंकरतय्सं धाःसा सरकारं विकास बजेट पर्याप्त मात्राय् खर्च याये मफयाः समस्या ब्वलनाच्वंगु द्वपं बिउगु दु ।

बैंकरतय् कथं सरकारं स्वलाया दुने यायेमाःगु विकास खर्च १० प्रतिशत हे मजूगुलिं यानाः राष्ट्र बैंकया धुकुती निगू खर्ब स्वयां अप्वः ध्यबा लानाच्वंगु खँ धयाच्वंगु दु । बैंकरतय् कथं थ्व ध्यबा बजारय् वयेगु खःसा तत्काल तरलताया समस्या समाधान जुइगु खनेदु । थ्व विषयय् राष्ट्र बैंकया प्रवक्ता नारायणप्रसाद पौडेलयात स्वापू तयेगु कुतः जूगु खःसां वय्कलं फोन ल्ह्वनामदी ।

सम्बन्धित बुखँ

LEAVE YOUR COMMENTS