थिमिइ चलः वनाः न्याखा छेँ खतराय्

थिमि – मध्यपुर थिमि नगरपालिका–१ लोकन्थलीइ लःया ट्यांकी दयेकेत खंगु गाःया कारणं चलः वनाः न्याखा छेँ जोखिमय् लाःगु दु । थिमि नगरपालिकाया १, २ व ३ वडाय् त्वनेगु लःया समस्या ज्यंकेगु निंतिं ट्यांकी दयेकेगु झ्वलय् गाः म्हूथाय् म्हीग बहनी वःगु वाया कारणं चलः वंगु खः ।

त्वनेगु लःया समस्या समाधान यायेत सरकारं १ करोड ३२ लाख तकाया लागतय् वडा नम्बर १ य् पाखा लूगु सार्वजनिक जग्गाय् न्यागू लाख लिटर लः न्ह्यनीगु ट्यांकी दयेकेगु ज्या यानाच्वंगु खः । वंगु वैशाख महिनांनिसें ट्यांकी दयेकेगु ज्या न्ह्याकूगु खःसां वा वइगु मौसम शुरु जूगु धासें ज्या दिकातःगु खः ।

वंगु भदौ १ गतेनिसें गाः म्हुइगु शुरु याःगु खःसा सिमा नापं चुइका यंकूगु चलखं यानाः पक्की छेँ जोखिमय् लाःगु खः । जोखिमय् लाःगु छखा छेँयात स्थानीय प्रशासनं पूर्ण रुपं खाली यायेधुंकूगु दु । चलः वनेवं ख्वपया सांसद महेश बस्नेत, प्रजिअ नारायण भट्ट, मध्यपुर थिमि नगरपालिकाया मेयर मदनसुन्दर श्रेष्ठ, सुरक्षा निकायया प्रमुखपिं, नेपाल विद्युत प्राधिकरण, खानेपानी संस्थानया प्रमुख– पिनिगु पुचलं चलः वंगु थासय् स्थलगत अवलोकन याःगु दु ।