दुर्घटनाय् बचे जूम्ह पाइलट खतरामुक्त, मेपिनि लाश म्हसीके मफु
येँ (नेपालभाषा टाइम्स)- येँया त्रिभुवन अन्तर्राष्ट्रिय विमानस्थलय् सौर्य एयरलाइन्सया विमान दुर्घटना जुयाः को–पाइलट सहित झिंच्याम्ह सीगु दुसा पाइलट मनिषरत्न शाक्य घाःपाः जूगु दु । म्हिगः सुथय् ११ः१५ बजे सौर्य एयरलाइन्सया जहाज पोखरा वनेगु उडानया झ्वलय् विमानस्थलय् दुर्घटना जूगु खः । विमान ब्वयेवं जवपाखे मोडे जुयाः कुतुं वंगु खः।
दुर्घटनाय् घाःपाः जूम्ह पाइलट शाक्ययात येँया सिनामंगलस्थित केएमसी अस्पतालय् वासः याकातःगु दुसा वय्कः खतरामुक्त जूगु खँ चिकित्सकतय्सं धाःगु दु । विमान सीचेकया नितिं पोखराय् वनेत्यंगु खः । विमान दुर्घटना जुयाः सीपिं फुक्कं सौर्य एयरया कर्मचारीत खः ।
विमान दुर्घटनाय् लानाः को–पाइलट सुशान्त कटवाल सहित अमितमान महर्जन, सागर आचार्य, दिलीप बर्मा, मनुराज शर्मा, अश्विन निरौला, सुदीपलाल जोशी, सर्वेस मरासैनी, श्याम विन्दुकार, नवराज आले, राजाराम आचार्य, अधिराज शर्मा, प्रिजा खतिवडा, उद्धव पुरी, यज्ञप्रसाद पौडल, सन्तोष महतो, पुण्यरत्न शाही व यमनी नागरिक अरेफ रेडा सीगु खः ।
जहाज दुर्घटनाय् लानाः सीपिनिगु पोस्टमार्टम म्हिगःनिसें न्ह्याःगु दु । त्रिवि शिक्षण अस्पतालया फरेन्सिक विभाग प्रमुख डा. गोपाल चौधरीया कथं पोस्टमार्टमया नितिं स्वंगू पुचः परिचालन जूगु दु ।
वय्कलं सीपिंत म्हसीके फइगु अवस्था मदुगुलिं सीपिनि छेँजःपिंसं बिउगु हुलिया, फिंगर प्रिन्ट व वाया आधारय् पोस्टमार्टम यायेगु ज्या न्ह्याकूगु खः । वय्कःया कथं छम्ह सीम्हया पोस्टमार्टम यायेत प्यघौ स्वयां अप्वः ई काइगु जूगुलिं फुकसिया म्हसीका खुले जुइधुंकाः जक थःथिति–पिंत सीम्ह बीगु जुइ । फुकसिया पोस्टमार्टम यायेत स्वन्हु माली ।
डा. चौधरीया कथं पोस्टमार्टम यायेगु नितिं त्रिवि शिक्षण अस्पताल, पाटन स्वास्थ्य विज्ञान प्रतिष्ठान व ख्वप अस्पतालया चिकित्सकत खटे जूगु दु । विमान दुर्घटना जुइवं प्रधानमन्त्री केपी शर्मा ओलीं म्हिगः हे नागरिक उड्डयन प्राधिकरणया अधिकारीतय्के ब्रिफिङ कयादीगु खः । दुर्घटनास्थलया अवलोकन यायेत प्रम ओली त्रिभुवन अन्तर्राष्ट्रिय विमानस्थल झाःगु खःसा वयां लिपा मन्त्रिपरिषद्या आकस्मिक बैठक च्वंगु खः ।
विमान दुर्घटना जुयाः कर्मचारीत सीगु शोकय् थौं राष्ट्रिय ध्वाँय् बछि क्वछुकेगु निर्णय जूगु दु ।
LEAVE YOUR COMMENTS