नेताया झ्वाता विवादं लँ दयेकेज्या ठप्प

येँ – भारतया दुवाः दुवातय् नेतातय् झ्वाता तये माल धकाः विवाद जुइगु यक्व न्यनेदु । अज्याःगु हे विवाद आः दाङय् नं खने दुगु दु ।
दाङया लँ दथुइ माओवादी समर्थक शहीद कृष्णसेन इच्छुकया झ्वाता तयेगु खः लाकि कांग्रेस नेता खुमबहादुर खड्काया झ्वाता तयेगु धइगु विवादं यानाः सतक दयेकेगु ज्या तकं प्रभावित जूगु दु ।

म्हिगः अन कृष्णसेनया झ्वाता तयेगु धकाः वंगु छगू पुचःयात प्रहरीं पना बिल । उमिसं दुवातय् इच्छुकया झ्वाता तयाः उगु राजमार्गया नां तकं इच्छुकया नामं तयेमाः धकाः माग याःगु खः । विवाद ताःहाकः जुया वँसेंलि पुचलं अन इच्छुकया झ्वाता शिलान्यास याना थकल ।
वहे इलय् उगु थासं करिब २० मिनेटया दूरीइ कांग्रेसया नेता खुमबहादुर खड्काया झ्वाता तयेगु धकाः हानं मेगु शिलान्यास यात ।

उमिसं नं राजमार्गया नां खड्काया नामं तयेमाः धकाः माग यात । खड्काया कार्यकर्तात अन झ्वाताया शिलान्यास यायेत डोजर हे ज्वनाः वःगु खः । छपु हे लँय् नापनापं निम्ह नेताया झ्वाता तयेगु खँय् विवाद जुइवं आः उगु राजमार्ग दयेकेगु ज्या समेत अवरुद्ध जूवंगु खँ धाःगु दु । स्वर्गद्वारी प्रवेशद्वारया रुपय् दयेकेत्यंगु उगु लँपुइ सुयागु झ्वाता गन तयेगु धइगु खँ क्वःमजिउगुलिं लँ दयेकेगु ज्या हे दिनाच्वंगु खँ धाःगु दु ।