ने. सं. ११४६ अनलाथ्व नवमी -

माइतीघर मण्डलाय् थौंया धर्ना जारी

येँ – स्वनिगःया नेवाःतय्सं अतिकं विरोध याःगु कारणं अन्ततः सरकारं गुथि विधेयक लित काःगु दु । म्हिगः भूमिसुधार मन्त्री पद्मा अर्यालं थःगु हे मन्त्रालयय् छगू पत्रकार सम्मेलन यासें विधेयक लित कयागु जानकारी बियादीगु खः ।

सरकारं गुथिलिसे स्वानाच्वंगु भूमियात उपयोग व गुथिया अधिकार व्यवस्थित यायेगु ताः तयाः विधेयक हयागु खःसां थुकिया विरुद्ध भ्रम न्यंकेगु कुतः जूगु कारणं सम्बन्धित सरोकारवालातलिसे संवाद यायेगु लागिं विधेयक लित कयागु खँ विज्ञप्तिइ धयातःगु दु ।

भूमिसुधार मन्त्री अर्यालं पत्रकार सम्मेलन यानाः विधेयक लित काःगुयां बाघौ लिपा हे हानं प्रधानमन्त्री केपी ओलीया पत्रकार सम्मेलन नं सिंहदरवारय् जूगु खः । प्रम ओली थम्हं हे ५ बजे पत्रकार सम्मेलन यायेगु तयारी यानाच्वंगु दयेक दयेकं छाय् हानं ४.३० बजे भूमिसुधार मन्त्रीयात पत्रकार सम्मेलन याकाः विधेयक लित कयागु जानकारी बीकल धइगु न्ह्यसः धाःसा सत्तारुढ पार्टी दुने ब्वलनाच्वंगु दु ।

मेखे म्हिगः सरकारं विधेयक लित कयागु जानकारी बिउसां आन्दोलनकारीतय्सं थौं घोषणा यानातःगु माइतीघर मण्डलाया धर्ना ज्याझ्वः धाःसा जारी हे जुइगु खँ धाःगु दु । उकुन्ह विरोध सभा धकाः धयातःगु थौंया ज्याझ्वःयात आः ‘खबरदारी सभा’ या रुपय् सञ्चालन यायेगु निर्णय नं आन्दोलनकारीतय्सं याःगु दु ।

मन्त्रीपाखें जारी याःगु वक्तव्यय् छ्यलातःगु भाषा व आः सरकारलिसे जुइगु संवादय् क्वातुक सहभागी जुइमाःगु कारणं सरकारयात अझ नं खबरदारी याना तयेमाःगु निर्णय नं आन्दोलनकारीतय्सं याःगु दु । म्हिगः बहनी लिबाक तक च्वंगु आन्दोलनकारीतय्गु बैठकं थौंया धर्ना ज्याझ्वःयात अझ शिष्ट दयेकेमाःगु खँय् बः बिउगु दु ।

कन्हय्या ज्याझ्वलय् गनं नं प्रहरीलिसे मुठभेड मजुइकेगु लागिं ज्याझ्वः न्ह्याके न्ह्यः हे प्रहरीयात स्वां लःल्हानाः स्वापू सुमधुर दयेकेगु ग्वसाः नं जुयाच्वंगु दु । थ्वहे झ्वलय् नेपालभाषा मंकाः खलःया नायः लिसें जनकवि दुर्गालाल श्रेष्ठं छगू वक्तव्य पिकासें विधेयक लित काःगुलिं सरकार लिसें थुकिया लागिं पहल यानादीपिं सकलें जनप्रतिनिधिपिंत सुभाय् देछाःगु दु ।

तर विधेयक लित काःसां झीगु माग धाःसा अझं पूमवंनिगु जुयाः आन्दोलन जारी हे याना तयेमाःगु खँ वक्तव्यय् धयातःगु दु । आःया आन्दोलन सरकारयात खबरदारी यायेगु शैलीं न्ह्याः वनेमाःगु खँ नं उकी धयातःगु दु ।

थौंया माइतीघर मण्डलाय् सुथय् ११ बजेनिसें धर्ना बीगु ज्याझ्वः तयातःगु दु । उकिया लागिं येँया थीथी थासय् मुनाः जुलुस माइतीघर मण्डला तक न्ह्याः वनेगु अन थ्यंकाः धर्ना बीगु ज्याझ्वः दयेकातःगु दु ।

विधेयक लित कायेत गनं गनं पहल

सतकय् आन्दोलन तच्वया वनेवं सतकया मागयात सरकारय् तक यंकाः विधेयक लित कायेकेगु तकया ज्या याकेत सत्तारुढ पार्टी नेकपाया येँया थीथी सांसद, मेयर व वडा अध्यक्षपिंसं तकं पहल यानादीगु खँ सीदुगु दु । येँ मनपाया मेयर विद्यासुन्दर शाक्यं छुं न्हि न्ह्यवंनिसें छुं वडा अध्यक्षपिंत समेत ज्वनाः थुकिया लागिं पहल यानादीगु खँ सीदुगु दु ।

थ्व झ्वलय् वय्कलं येँनं त्याःपिं नेकपाया सांसदनाप संवाद यासें भूमिसुधार मन्त्री व प्रधानमन्त्रीयात नं नापलानादीगु खःसा सांसद जीवनराम श्रेष्ठं वरिष्ठ नेता माधव नेपालयात ‘कन्भिन्स’ यायेत भूमिका म्हितादीगु खः । अथे हे सांसद कृष्णगोपाल श्रेष्ठं वालुवाटारय् हे वनाः पहल यानादीगु खःसा प्रदेश सभाया सांसद डा. अजयक्रान्ति शाक्यं प्रमयात तप्यंक हे विधेयक लित कायेत निरन्तर सुझाव बियादीगु खः ।