भोटो क्यनाः बुंगद्यःया जात्रा क्वचाल
यल(नेपालभाषा टाइम्स)÷नेपाःया दकलय् ताःहाकःगु जात्रा धयातःगु बुंगद्यःया रथ जात्रा म्हिगः क्वचाल । म्हिगः थनया जावलाखेलय् बुंगद्यःया भोटो क्यनेगु ज्या यासें थुगु दँया जात्रा नं क्वचायेकूगु खः । वर्षा व सहकालया द्यःया रुपय् नालातःम्हक बुंगद्यःया रथजात्राया अन्तिम न्हि कुन्हु भोटो क्यनेगु चलन दु ।
भोटो जात्रा स्वयेत राष्ट्रपति रामचन्द्र पौडेल, प्रधानमन्त्री केपी शर्मा ओली लिसें आपालं विशिष्ट व्यक्तित थ्यंगु खः । रथय् च्वनाः भोटो क्यनेगु ज्या धाःसा गुथि संस्थानया प्रमुख बैकुण्ठ आचार्यं यानादीगु खः ।
भोटो क्यनेगु जात्रा क्वचायेवं म्हिगः हे बुंगद्यःयात रथं कुहांबिज्याकाः खतय् तयाः बुंगय् यंकूगु खः । जात्रा लिपा बुंगद्यःयात बाजागाजा सहित आपालं मनूत छ्वालि च्याकाः बुंगय् तक हे न्यासि वनेगु चलन दु ।
बुंगद्यःयात बुंगय् यंकेगु झ्वलय् बुंगद्यःया सम्पत्ति नं नापं यंकेगु चलन दु । बुंगद्यःयात बुंगय् यंकूसां प्यन्हु तक देगलय् मतसे पिने हे तयातइ । प्यन्हु दुकुन्हु प्यन्हु बिचाः वनेगु चलन दु । आः बुंगय् विराजमान जूम्ह बुंगद्यःया मंसिरं यःमरि पुन्हि कुन्हु हानं खतय् तयाः यलय् हइ ।
LEAVE YOUR COMMENTS