न्यू क्यासलयात बुकाः लिभरपुल शीर्ष थासय्

प्रिमियर लिगया उपाधिया निंतिं म्यानचेस्टर सिटी लिसे धेंधेंबल्लाः यानाच्वंगु लिभरपुल शीर्ष थासय् वःगु दु । म्हिगः जूगु कासाय् लिभरपुल न्युक्यासलयात ३–२ गोलं बुकाः शीर्ष थासय् वःगु खः । न्युक्यासलया मैदानय् लिभरपुलं न्हापागु हाफया १३ औं मिनेटय् भर्जिल भान डिजेकया गोलं अग्रता काःगु खः ।

न्युक्यासलया क्रिष्टियन अट्सुं २० औं मिनेटय् बराबरी गोल याःगु खःसां थ्वयां ८ मिनेट लिपा हे मोहम्मद सलाह गोल यानाः हाकनं लिभरपुलयात अग्रता बिल । निगूगु हाफया ५४ औ मिनेटय् न्युक्यासलं हाकनं गोल यानाः कासा बराबरीइ हल । थ्व पालय् न्युक्यासलया निंतिं रोन्डोनं गोल यात ।

कासाया ८८ औं मिनेटय् लिभरपुलया ओरिगीं गोलं यानाः न्यु क्यासलयात बुकूगु खः । लिभरपुलं आः लिगया छगू जक कासा म्हिते ल्यंदनि । शीर्ष थासय् च्वंगु लिभरपुलया ३७ कासा म्हिताः ९४ अकं दु । छगू कासा म्हो जक म्हितूगु म्यानचेस्टर सिटीया ९२ अंक दु । लिग त्याकेगु लागि लिभरपुलं अन्तिम कासा त्याकां जक मगाः सिटी पराजित जूगु नं स्वयेखनेमाः ।

लिभरपुलं अन्तिम कासा वुल्भसलिसे म्हिती ।लिगया मेगु कासाय् टोटनह्याम बर्नमाउथनाप १–० गोलं पराजित जुल । कासाय् पराजित जुइव टोटनह्याम शीर्ष प्यंगुलिइ च्वनाः लिग सिधेयेकेगु खँय् तःधंगु दबाब लाःगु दु । बर्नमाउथयात बुकूगु जुसा टोटनह्याम शीर्ष प्यंगुलि लाइगु निश्श्चित दुगु खः ।

निगु ह्याउँगु कार्ड नयाः गुम्ह कासामिइ सीमित जूगु टोटनह्यामं गोल यासे मफुसां ९० मिनेटतक गोल नं मनःगु खः, तर कासा क्वचाये त्ययेकाः इन्जुरी टाइमय् बर्नमाउथया एकें गोल यानाबिल । टोटनह्यामया सन हेङ मिनं कासाया ४३ औ मिनेटय् व फोथं ४८ औं मिनेटय् ह्याउँगु कार्ड नःगु खः।

टोटनह्याम आः ३७ गू कासा म्हिता ७० अकं सहित लिगया स्वंगूगु थासय् दु । प्रिमियर लिगया मेगु कासाय् वुल्भ्सं फुलह्यामयात १–० गोलं, वेष्ट ह्यामं साउथह्याम्पटनयात ३–० व क्रिष्टल प्यालेसं कार्डिफ सिटीयात ३–२ गोलं बुकल । क्रिष्टल प्यालेसनाप बूगु कार्डिफ सिटी रेलिगेशनय् लाःगु दु ।

सम्बन्धित बुखँ

LEAVE YOUR COMMENTS