कालिमाति व मीनभवनया ताँय् संसदया अनुगमन

येँ – थनया टेकू व मिनभवनय् दयेकाच्वंगु ताँयात संसदया विकास तथा प्रविधि समितिं अनुगमन याइगु जूगु दु । कालिमाटी–टेकू स्वाइगु ६२ मिटर ताःहाकःगु ताँ व मीनभवन–तीनकुने स्वाइगु बागमति ताँ तसकं बमलाक दयेकूगु धासें विकास समितिइ खँ पिहां वःगु खः ।

थ्व निपुं ताँ पप्पु कन्स्ट्रक्सनं दयेकूगु खः । ताँ प्राविधिक रुपय् कमजोर जूगु धासें सतक विभागं ताँ चले मयाकुसे पनातःगु दुसां टेकु ताँय् धाःसा यातायात सञ्चालन जुयाच्वंगु दु । ताँ हस्तान्तरण मजूगु, ताँय् खनेदुगु प्राविधिक समस्या समाधान मयासे दयेके सिधयेकूगु व परामर्शदातां बिउगु सुझाव पालना मयाःगु द्वपं सडक विभागं बिउगु दु ।

उगु ताँया गुणस्तर बारे विकास समितिइ खँ वयेवं राष्ट्रिय सतर्कता केन्द्र, सतक विभाग, निर्माण कम्पनी, विज्ञ प्राविधिक व समितिया सांसदतय्गु पुचलं अनुगमन यायेगु बारे सहलह ब्याकूगु खः । ताँ गुणस्तरहीन जूगु धासें थ्व दयेकाच्वंगु इलय् थुना छ्व धकाः सडक विभागं निर्देशन बिउगु खःसां नं ठेकेदारं चांचां ताँ दयेकेगु ज्या न्ह्याकूगु खः । अथे हे भौतिक पूर्वाधार तथा यातायात मन्त्री रघुवीर महासेठं नं ताँ थुनाः हाकनं दयकेमाः धायेगु यानाच्वंगु खः ।