आः फोहरया गाडीयात प्रवेश शुल्क
येँ(नेपालभाषा टाइम्स)- स्वनिगःया फोहर ज्वनाः अन्तिम व्यवस्थापनया निंतिं बञ्चरेडाँडा वनीगु दक्वं गाडीयाबे प्रवेश शुल्क काइगु जूगु दु । ककनी गाउँपालिकां वइगु साउन १ गतेनिसें फोहर ज्वनाः बञ्चरेडाँडा वनीगु दक्वं गाडी याके प्रवेश शुल्क कायेत्यंगु खः ।
गाउँ परिषदं साउन १ गतेनिसें फोहर ज्वना वइगु तग्वःगु गाडीया निंतिं १०० तका व मेमेगु गाडीया निंतिं द्वःछि तका कायेगु ल्याखं आर्थिक विधेयक पास याःगु खः । गाउँपालिकाया अध्यक्ष सुमन तामाङं आर्थिक दँ ०८०÷८१ शुरु जुइगु साउन १ निसें फोहर ज्वना वइगु प्रतिगाडी सछि तकाया ल्याखं शुल्क कायेगु जानकारी बियादीगु दु ।
फोहर व्यवस्थापन स्थानीय तहया जिम्मेवारी जूगु व थथे यायेबलय् शुल्क काये दइगु वय्कःया धापू दु । ल्याण्डफिल साइट प्रभावित क्षेत्र जूगु स्वाभाविक रुपं फोहर व्यवस्थापन याइपिंके प्रभावितया रुपय् थःपिंसं समान व्यवहार यायेगु वय्कलं धयादीगु दु ।
संविधानत सवारी आवागमनयात प्रभावित यायेकथं स्थानीय तहं उकथंया शुल्क कायेगु अधिकार बियातःगु मदु । तर साउन १ गतेनिसें बञ्चरेडाँडाय् अन्तिम व्यवस्थापनया निंतिं फोहर ज्वना वइगु गाडीयाके प्रवेश शुल्क कायेगु ल्याखं उकिया बारे जानकारी बीत दक्वं स्थानीय तहयात पत्राचार यायेधुंगु वय्कलं कनादिल । लिसें वय्कलं फोहर ज्वना वइगु गाडीया सवारी चालकयात नं थ्व बारे जानकारी याकागु वय्कलं धयादीगु दु ।
येँ महानगरपालिकालिसें स्वनिगःया थीथी नगरपालिकां न्हिं औसत ११०० मेट्रिक टन फोहर बञ्चरेडाँडाय् अन्तिम व्यवस्थापन याना वयाच्वंगु दु । येँ महानगरपालिकां जक सामान्य अवस्थाय् न्ह्ंि ५०० मेट्रिक टन स्वयां अप्वः फोहर व्यवस्थापन याना वयाच्वंगु दुसा मेगु फोहर नागार्जुन, तोखा, तारकेश्वर, गाकर्णेश्वर, कागेश्वरी, मनहरा, भुइजःसि, चन्द्रागिरि, यल महानगर, महालक्ष्मी, गोदावरी, मध्यपुर थिमिलिसें काभ्रे व मण्डनदेउपुरं नं बञ्चरेडाँडाय् फोहर व्यवस्थापन याना वयाच्वंगु दु ।
थुपिं स्थानीय तहपाखें फोहर ज्वना वइगु गाडीं आः ककनी गाउँपालिका दुने वनीगु इलय् हे प्रवेश शुल्क पुलेमाःगु जुइ ।
LEAVE YOUR COMMENTS