ने. सं. ११४४ कौलाथ्व पारू - नःलास्वनेगु

परवेज मुसर्रफयात मृत्युदण्डया फैसला

एजेन्सी- पाकिस्तानया छगू अदालतं पुलांम्ह राष्ट्रपति परवेज मुसर्रफयात मृत्युदण्डया सजाय न्यंकूगु दु । पुलांम्ह सेना प्रमुख मुसर्रफयात इस्लामाबाया छगू विशेष अदालतं देशद्रोहया द्वपनय् मृत्युदण्डया सजाय न्यंकूगु खः । मंगलवाः जूगु सुनुवाइलय् मुख्य न्यायाधीशसहित स्वम्ह न्यायाधीया इजलासं मुसर्रफयात संविधानया अवहेलना याःगु व गम्भीर देशद्रोह याःगु मुद्दाय् दोषी ठहर यासें वय्कःया अनुपस्थितिइ हे मृत्युदण्डया सजाय न्यंकूगु खः ।

मुसर्रफ थौंकन्हय् दुबइलय् उपचार याकाच्वंगु दु । मुद्दा न्ह्यानाच्वंगु इलय् मुसर्रफ सन् २०१६ या मार्चय् युएइया दुबइलय् उपचारया निंतिं वंगु खः । छुं न्हि न्ह्यव जक वय्कलं छगू भिडियो सन्देश छ्वयाः थःगु स्वास्थ्य अवस्था स्यनावनाच्वंगु धासें मुद्दा स्वयाच्वंगु निकाययात थःगु स्थिति स्वःवयेत इनाप याःगु खः । मुसर्रफं थः विरुद्ध लानाच्वंगु द्वपंयात धाःसा अस्वीकार याना वयाच्वंगु दु ।

मुसर्रफ सन् २००१ निसें २००८ तक पाकिस्तानया राष्ट्रपति जूगु खः । राष्ट्रपति जुयाच्वंगु हे इलय् सन् २००७ या नोवेम्भर ३ य् संकटकाल घोषणा याःगुलिं वय्कःयात देशद्रोहया मुद्दा तःगु खः । उबलय् वय्कलं संकटकाल घोषणा यानाः संविधान निलम्बन यानाबिउगु खः । सन् २०१३ निसें थ्व मुद्दा विचारधीन जुयाच्वंगु दु । पाकिस्तानी सञ्चारमाध्यमतय्सं सुं नं राष्ट्र प्रमुखयात थुकथं मृत्युदण्डया सजाय न्यंकूगु इतिहासय् हे न्हापांखुसी जूगु खँ धाःगु दु ।