निम्ह अध्यक्षया विवाद बैठक प्रभावित
नेकपा केन्द्रीय कमिटी बैठक
येँ (नेपालभाषा टाइम्स) – निम्ह अध्यक्ष दथुइ ब्वलनाच्वंगु विवादया कारणं यानाः सत्तारुढ नेपाल कम्युनिष्ट पार्टी (नेकपा)या केन्द्रीय कमिटीया बैठक तकं प्रभावित जूगु दु । वंगु भदौ २६ गते क्वचाःगु स्थायी कमिटीया बैठकं तत्कालया नितिं पार्टीया अन्तरविरो ध ज्यंकाः थ्वहे वइगु कार्तिक १५ व १६ गते केन्द्रीय कमिटीया बैठक सःतेगु निर्णय याःगु खः । तर निम्ह अध्यक्ष प्रधानमन्त्री केपी शर्मा ओली व मेम्ह अध्यक्ष पुष्पकमल दाहाल दथुइ तारन्तर जूगु सहलहं छुं हे लिच्वः पिहां मवयेवं आः केन्द्रीय कमिटीया बैठक हे स्थगित याये माःगु अवस्था ब्वलंगु खः । अध्यक्ष दाहाल व प्रम ओली दथुइ जूगु सहमति मेम्ह अध्यक्ष ओलीं कार्यान्वयन मयाये वं दाहालं प्रम ओली लिसे मेगु थप सहलह मयायेगु खँ थः सतिपिं नेतापिंत धायेगु यानाहःगु खँ धाःगु दु ।
निम्ह अध्यक्ष दथुइ ब्वलंगु विवादया कारणं यानाः वइगु चैत २५ निसे ३० गते तक जुइ धाःगु राष्ट्रिय एकता महाधिवेशन नं प्रभावित जूवंगु दु । प्रम ओली व दाहालया दथुइ न्हिथं धयाथें सहलह जुयाच्वंगु खःसां नं प्रम ओलीं धायेगु छगू व यायेगु छगू यानाच्वंगुलिं दाहालं असन्तुष्टि प्वंका वयाच्वंगु खः ।
थ्वहे झ्वलय् ओली यकःति कथं मन्त्रिमण्डल विस्तार यायेगु लिसें थीथी देय्या राजदूत नियुक्ति यायेवं दाहालं असन्तुष्टि प्वंकेगु जक मखुसे आः वयाः ओली लिसे सम्वाद तकं मयायेगु अडान कयाच्वंगु दु । थ्वहे झ्वलय् प्रम ओली दाहालयात ह्यकेगु निंतिं पुलांम्ह सभामुख सुवास नेम्वाब, ५ नम्बर प्रदेशया मुख्यमन्त्री शंकर पोखरेल व उपप्रधानमन्त्री ईश्वर पोखरेलयात छ्वःगु खःसा दाहालं प्रम ओलीं थःलिसे जूगु आपालं सहमति उल्लंघन याःगुलिं यानाः आः केन्द्रीय कमिटीया बैठकय् जक निर्णय यायेगु धकाः लिसः बियाहःगु खँ सीदुगु दु ।
LEAVE YOUR COMMENTS