नेवाः सांस्कृतिक पुनर्जागरण अभियानया सहलह मुँज्या

यल – नेवाः सांस्कृतिक पुनर्जागरण अभियानं स्वनिगलय् लिपांगु इलय् खने दयाच्वंगु नेवाः सरोकारया विषययात कयाः सहलह मुँज्या याःगु दु । अभियानं राज्यसत्तां लिपांगु इलय् स्वनिगःया आदीवासी नेवाःतय्त विस्थापित यायेगु ल्याखं छेँ–बुँ, गुथि, जग्गा, संस्कृतिइ लगायतया क्षेत्रय् विकासया नामय् हयाच्वंगु योजनायात कयाः उकथं सहलह मुँज्या याःगु खः ।

ज्याझ्वलय् नेवाः न्ह्यलुवा डा. महेशमान श्रेष्ठं स्वनिगःया आदिवासी नेवाःतय् अधिकारया बारे व्यापक रुपं जनचेतना थनेगु व सकल नेवाःतय्त छधी छप्पँ यानाः आन्दोलन न्ह्याकेमाःगु विचाः तयादिल ।

अभियानया कजि अशोक महर्जनं अभियान उद्देश्य बारे जानकारी बियादिसें न्ह्याःगु ज्याझ्वलय् अभियन्तापिं दीपक तुलाधर, उमेश स्थापित, समिर महर्जन, सुरज महर्जन, यादवलाल कायस्थ, श्रीृकष्ण मानन्धर, प्रविण ज्यापु, कृष्णगोपाल भायो, राजभाइ जकःमि, अमोघवज्र वज्राचार्य लगायतं नेवाःतय्सं स्वनिगःया सांस्कृतिक, सामाजिक, धरोहर, सम्पदायात ल्यंकेया निंतिं म्हितेमाःगु भूमिकायात कयाः थःथःगु नुगःखँ तयादीगु खः ।

उगु मुँज्याय् नेवाः न्ह्यलुवालिसें थीथी नेवाः खलः, पुचःपाखें नं अभियानय् एक्यवद्धता प्वंकेगु बारे सहलह ब्याकूगु खः ।