एमसीसी – नारायणकाजीया पुचः पार्टी हे त्वःता वनेगु तकया मनःस्थितिइ

येँ – गठबन्धन सरकारं एमसीसी पारित यायेवं माओवादी केन्द्र दुने आन्तरिक कचवं पिहां वःगु दु । पार्टी अध्यक्ष पुष्पकमल दाहाल समेत जानाः जनतायात झंगःलानाः एमसीसी पारित याःगु धासें वरिष्ठ नेता नारायणकाजी श्रेष्ठ लगायतया नेतात तम्वःगु दुसा उमिसं थ्वहे कारण न्ह्यःने तयाः पार्टी हे त्वःता वनेगु तकया मनःस्थिति दयेकाच्वंगु खँ धाःगु दु ।

श्रेष्ठयात पार्टी त्वःता वनेगु सवालय् गिरिराजमणि पोखरेल, अञ्जना बिशंखे आदिपिंसं नं साथ बियाच्वंगु खँ धाःगु दु । संसदं एमसीसी पारित जुइवं हे नारायणकाजी श्रेष्ठं सामाजिक सञ्जालपाखें थःगु बिचाः तसें थुकिया लागिं न्ह्यःने हःगु ‘व्याख्यात्मक टिप्पणी’ या आलोचना यानादीगु खः । वयां लिपा म्हीग याःगु पत्रकार सम्मेलनय् पार्टी अध्यक्ष पुष्पकमल दाहालं श्रेष्ठया उगु टिप्पणीयात सार्वजनिक रुपं हे आलोचना यासें ‘यदि पार्टी त्वःता वन धाःसा प्रेम सुवालया हालत जुइ’ धइथेंज्याःगु भासं न्ववाःगुलिं श्रेष्ठया पुचः झन् तम्वःगु खँ धाःगु दु ।

दाहालया थज्याःगु अभिव्यक्ति वयेधुंकाः श्रेष्ठपाखें आः पार्टी त्याग याये माली धइगु आसयया बिचाः न्ह्यःने तसें पासापिंसं सुझाव बी माल धकाः इनाप यानादीगु खः । एमसीसी पारित जूगु खँय् असन्तुष्ट जूगु पुचलं जुम मिटिङ तयाः थुकिया बारे सहलह समेत याःगु खः । करिब सत्याम्ह मनू दुथ्याःगु उगु मिटिङय् वःपिंसं आः पार्टी त्वःताः न्हूगु हे पार्टी निर्माण यायेमाःगु तकया बिचाः तःगु खः । उकी ब्वति काःपिं आपालं नेता कार्यकर्तातय्सं पार्टीइ च्वनाः कलंकया सिन्हः तिनाच्वनेगु पलेसा पार्टी हे त्वःता वंसा बांलाइ धइगु बिचाः तकं अभिव्यक्त याःगु खः ।

सूत्रतय्सं आः थ्वहे वइगु फागुन २० गते माओवादी केन्द्रया केन्द्रीय बैठक च्वनेत्यंगु दु । खास यानाः पार्टीया पदाधिकारी ल्ययेत च्वनेत्यंगु उगु बैठकय् हे असन्तुष्ट पुचलं थःगु खँ तयेगु व अन छुं सुनुवाई मजुल धाःसा थःगु लँ लिना वनेगु धकाः मनःस्थिति दयेकाच्वंगु खँ सूत्रं धाःगु दु ।

श्रेष्ठया छेँय् दाहाल
एमसीसीया कारणं पार्टी हे त्वःता वनेगु तकया मनःस्थिति दयेकाच्वंम्ह नेता नारायणकाजी श्रेष्ठयात ह्ययेकेगु लागिं म्हिगः माओवादी अध्यक्ष पुष्पकमल दाहाल थः हे श्रेष्ठया छेँय् वनाः खँल्हाबल्हा यानादिल । उगु इलय् दाहालं पार्टी त्वःता वनेगु बिचाः यानादीमते धकाः श्रेष्ठयात इनाप यानादीगु खःसा श्रेष्ठं ‘छिं पार्टी त्वःता वंसां जिउ धइगु अभिव्यक्ति बियादिल’ धकाः दुःख प्वंकादीगु खः । दाहालं थम्हं अथे धयागु मखु धासें थःगु मतभेद दुसा बरु पार्टीया बैठकय् हे तयाः न्ह्याः वनेत इनाप यानादीगु खः । वय्कलं थौंया अवस्थाय् पार्टी एकता अझ आवश्यक जूगु बारे नं बिचाः तयादीगु खँ सूत्रं धाःगु दु ।