चेतनां पीच्याम्ह विद्यार्थीयात छात्रवृत्ति लःल्हात
येँ – चेतना नांया संस्थां स्वनिगःया न्यागू सामुदायिक विद्यालयया मुक्कं पीच्याम्ह विद्यार्थीयात छात्रवृत्ति लःल्हाःगु दु । शैक्षिक दँ २०७६ निंतिं उकथं विद्यार्थीतय्त छात्रवृत्ति लःल्हाःगु खः । शिक्षा, विज्ञान तथा प्रविधिमन्त्री गिरिराजमणि पोखरेलं छगू ज्याझ्वःया दथुइ छात्रवृत्ति लःल्हानादीगु खः ।
२०६९ सालंनिसें संस्थां न्हिं छगू कप च्या बराबर झितका दां ग्वाहालि मुंकाः उगु इलय् प्यम्ह विद्यार्थीयात छात्रवृत्ति बीगु शुरु यानागु संस्थां जानकारी बिउगु दु । ज्याझ्वलय् नवासें मन्त्री पोखरेलं चेतनां शिक्षाया ख्यलय् यानाच्वंगु थुकथंया चिधंगु ग्वाहालिं शैक्षिक चेतना अभिवृद्धि यायेत म्हितूगु ज्यायात कयाः च्वछायादिसें थः स्वयं नं थुकथंया उदाहरणीय ज्याय् सहभागि जुइत न्हिं छगू कप च्या बराबरया ध्यबा संस्थायात बियाः चेतनाया दुजः जुयागु घोषणा नं यानादिल ।
येँ महानगरपालिकाया प्रवक्तालिसें वडा नं. १५या वडाअध्यक्ष ईश्वरमान डंगोलं सामुदायिक विद्यालयया विकासया निंतिं वर्तमान अवस्थाय् राज्य स्वयं न्ह्यचिलेमाःगु अवस्थाय् चेतना थेंज्याःगु संस्थां निःस्वार्थ रुपय् ज्या याना वयाच्वंगु धासें संस्थाया अभियानयात कयाः च्वछायादिल ।
गीतामाता उ.मा.वि.या प्रधानाध्यापक हरिकृष्ण श्रेष्ठं थुकथंया छात्रवृत्ति लःल्हायेगु ज्यां आर्थिक अवस्था कमजोर जूपिं विद्यार्थीतय्क आखः ब्वनेमाः धइगु भावना अभिवृद्धि जुइ धयादिल । सहयोगी संस्था हात्तीवन सामाजिक संस्थाया मय्जु प्रमि श्रेष्ठं चेतनाया चिधंगु कुतलं शुरु जूगु ज्या व तःभुखाय्या इलय् विद्यालयया विद्यार्थीयात याःगु ग्वाहालियात निंतिं चेतनालिसें सहकार्य यानागु जानकारी बियादिल।
ज्याझ्वलय् डल्लुया निपु हिति ग्वसाः खलःया नायः त्रिरत्न मानन्धरं निम्ह विद्यार्थीयात छात्रवृत्ति लःल्हायेगु प्रतिवद्धता प्वंकादीगु खःसा समाजसेवी परमानन्द वज्राचार्यं झिद्वः तका दां संस्थाया नायः आनन्दमुनि वज्राचार्ययात लःल्हानादिल ।
संस्थाया नायः वज्राचार्यं छखे लखौं तका खर्च यानाः निजी स्कुलय् आखः ब्वंका च्वंगु दुसा मेखे सामुदायिक विद्यालयया अभिभावकपिं आवश्यक न्यूनतम शैक्षिक सामग्री तकं चूलाके फुगु अवस्था दुगु जानकारी बियादिल । संस्थाया सचिव रीना वज्राचार्यं लसकुस यानादीगु ज्याझ्वलय् दुजः डा. चन्द्रेशरत्न तुलाधरं सुभाय् देछानादीगु खः ।
LEAVE YOUR COMMENTS