किपू नपाय् मोहनिया भिंतुना कालबिल

किपू – किपू नगरपालिकापाखें मोहनि नखःया लसताय् भिंतुना कालबिल ज्याझ्वः याःगु दु । नगरपालिकां नेपाःमिपिनिगु तःजिगु नखः मोहनिया लसताय् उगु ज्याझ्वः याःगु खः।

ज्याझ्वलय् किपू नगरपालिकाया जनप्रतिनिधिलिसें कर्मचारीतय् उपस्थिति दुगु खःसा सकसिनं मोहनि नखःया भिंतुना कालबिल याःगु खः । किपू नगरया ज्याथम्ह जनप्रतिनिधि १ वडाअध्यक्ष हर्ष महर्जनं नगर प्रमुख रमेश महर्जन व प्रमुख महर्जनं उपप्रमुख सरस्वति खड्कायात मोहनि सिन्हः तिकाः भिंतुना बियादीगु खः ।

वयां लिपा नगर प्रमुख महर्जन व उपप्रमुख खड्कां छसिकथं २ वडाअध्यक्ष रमेशमान डंगोल, ३ वडाअध्यक्ष राजेन्द्र महर्जन, ६ वडाअध्यक्ष न्हुछेबहादुर महर्जन, ८ वडाअध्यक्ष विनोद महर्जन, ९ वडाअध्यक्ष गंगाराम महर्जन व १० वडाअध्यक्ष अमन महर्जनयात सिन्हः तिकाः भिंतुना बियादीगु खः ।

थुकथं हे वडासदस्यपिं धनबहादुर महर्जन, मिलन महर्जन, ज्ञानप्रसाद महर्जन, दिपेन्द्र विष्ट, चिनिकाजी श्रेष्ठपिंत नं सिन्हः तिकाः भिंतुना बियादीगु खः । उगु इलय् नगर प्रमुख व उपप्रमुखं नगरपालिकाया कानूनी सल्लाहकार कृष्णहरि खतिवडा, नगर प्रमुखया सचिवालयया विकास महर्जन व मनदेवी महर्जन, उपप्रमुखया सचिवालयया संजिता लामालिसें कर्मचारी व सामाजिक परिचालिकापिंत नं सिन्हः तिकाः भिंतुना बियादीगु खः ।