विराटया २० क्वःगु तःमुँज्या
ख्वप – विराट नेपालभाषा साहित्य सम्मेलन गुथि, ख्वपया २० क्वःगु तःमुँज्या म्हीग शनिवाः थिमिया शंखधर पार्टी प्यालेसय् छगू ज्याझ्वःया दथुइ क्वचाल । बरिष्ठ कवि योगेन्द्र प्रधानं उलेज्या यानादीगु उगु ज्याझ्वलय् गुथिया नायः कृष्णभक्त बोडेया सभापतित्वय् न्ह्याःगु न्हापांगु सत्रय् गुथिया न्वकु हिरण्यप्रताप साङ्गामीं लसकुस यानादी खःसा छ्यांज्ये बाबुकाजी श्रेष्ठं सांगठनिक प्रतिवेदन व दांभरिं प्रदीप शाक्यं आर्थिक प्रतिवेदन न्ह्यब्वयादीगु खः ।
स्वदँया निंतिं न्हूगु ज्यासना पुचः ल्ययेत नरेन्द्रभक्त हाडा, तुईलाल श्रेष्ठ व राम सिख्वःया निर्वाचन मण्डलं यागु ल्यज्यां महेन्द्रगोपाल कर्माचार्ययात निर्विरोध नायः ल्यःगु दु ।
चुनावं ल्यःपिं १० म्ह दुजःपिंत उगु हे दिनय् जूगु ज्यासना पुचःया न्हापांगु मुँज्यां न्वकु कृष्णलाल गोजा श्रेष्ठ, छ्याञ्जे पुष्पलाल तिमिला, लिउ छ््याञ्जे नवीनप्रकाश श्रेष्ठ, दांभरी रामगोपाल चगुठी, अथे हे दुजलय् सुलोचना सैजू, विजेन्द्र वीर कर्माचार्य, बाबुकाजी सुवाल, बालकृष्ण प्रधान, योगी स्यस्यः व दिनेश कक्षपति मनोनित याःगु दु । पुलांम्ह नायः पदेन सदस्य कथं दुजः जुइगु प्रावधानकथं कृष्णभक्त बोडे दुजः कथं च्वनादीगु दुसा ज्याझ्वलय् पुलांम्ह नायः त्रिरत्न शाक्यं न्हूगु ज्यासना पुचःया सकल दुजःपिंत भिंतुना देछानादीगु दु ।
न्हूगु ज्यासना पुचपाखें न्हूम्ह नायः कर्माचार्यं न्ववायेगु झ्वलय् न्हापानिसें यानावयाच्वंगु ज्याझ्वःया नापनापं गुथि छेँ दनेगु, ह्याउँबालायात दँय् छकः प्रिन्ट पत्रिका नापं दँय् निक्वः अनलाइन पत्रिकाकथं पिथनेगु, सदस्यता अभियान न्ह्याकेगु, नेपालभाषा स्यनेगु ज्याय् ग्वाहालि यायेत विराट अनलाइन ब्वनेकुथि न्ह्याकेगु, विराटया जीवननापं स्वापूदुपिं सकसितं मुंकाः पुनर्मिलन ज्याझ्वः यायेगु, भाषा साहित्य थपूया निंतिं राज्यनापं माग न्ह्यब्वयेत मंकाः धारणा दयेकेत सहलह ज्याझ्वः यायेगु लगायतया प्रतिवद्धता प्वंकादीगु दु ।
ज्याझ्वलय् गुथिया मदुम्ह संस्थापक दुजः रत्नगोपाल साँय्जूया नामं नेपालभाषा एम.ए. दकलय् उप्वः ल्याः हयाः ताःलाःम्हेसित सिरपा बीत वय्कःया म्ह्याय्मय्जु सुलोचना सैजूं छगू लख तका दां अक्षयकोष तयेगु नं घोषणा यानादीगु दु ।
LEAVE YOUR COMMENTS