मञ्जुश्रीया ३३ फिट तजाःगु मूर्ति

येँ – स्वनिगःया उत्पत्तिलिसे स्वाःगु थीथी खँत तयाः चोभारय् छगू म्युजियम दयेकीगु जूगु दु । थुकिया लागिं अन महामञ्जुश्रीया ३३ फिट तःधिकःम्ह मूर्ति पलिस्था याइगु जूगु दु । थौंकन्हय् उगु मूर्ति दयेकेगु ज्या क्वचायेकेधुंकूगु दुसा आः उकिया क्वय् बेस जक तये ल्यं दनि । कन्हय् ८ गते उगु मूर्तिया रत्नन्यास यानाः पुजा यायेत्यंगु दु ।

महामञ्जुश्रीं चोभारया पहाडयात थःगु खड्गं पालाः स्वनिगलय् मुनाच्वंगु लः पित छ्वःगु व वयां लिपा थ्व थासय् मानव वस्ती सुरु जूगु खः धइगु किंवदन्ती दु । वैज्ञानिकतय्सं नं थनिं करिब प्यंगू लाख दँ न्ह्यः तक स्वनिगः लखं जायाच्वंगु पुखू हे खः धइगु खँ पुष्टि यायेधुंकूगु दु ।३३ रोपनी जग्गा दुगु उगु लागाय् स्वनिगः उत्पत्ति सम्बन्धी मेमेगु नं हलंज्वलं तयाः छगू संग्रहालयया रुप बीत्यंगु खँ सीदुगु दु ।