खुलाया दुने झिंन्हय्गू जलविद्युतयात अनुमति
येँ – सरकारं चालु आर्थिक दँया खुला दुने झिंन्हय्गू जलविद्युत आयोजना प्रवद्र्धकयात मत उत्पादनया अनुमति बिउगु दु ।सर्वेक्षण क्वचायेकाः निर्माणया चरणय् थ्यनेधुंकूगु थुपिं आयोजनायात तुरन्त वित्तीय व्यवस्थापन यानाः ज्या न्ह्याकेत निर्देशन सहित अनुमति बिउगु खः । अनुमति काःपिं मध्ये फुक्क धयाथें निजी ख्यलं दयेकेत्यंगु आयोजना खः ।अनुमति काःगु फुक्कं आयोजना स्वायेबलय् ७४१ मेगावाट जूवइ । सरकारं आःतक १५१ गू जलविद्युत आयोजनायात मत उत्पादनया निंतिं अनुमति बीधुंकूगु दु । थथे अनुमति पत्र कयातःगु आयोजनाया क्षमता जक स्वायेबलय् ४ हजार ४३५ मेगावाट थ्यनेधुंकूगु दु ।
चालु आवय् अनुमतिपत्र काःगु आयोजना मध्ये फुक्कसिनं वइगु दछि दुने वित्तीय व्यवस्थापन यानाः निर्माण चरणय् वनेगु तयारी यानाच्वंगु दु ।
विभागया महानिर्देशक नवीनराज सिंहया कथं थ्व दँय् कोयिाली लगानी दइगु माथिल्लो त्रिशुली १ जलविद्युत आयोजनां नं उत्पादन अनुमति काःगु खः । थ्व आयोजना चालु आर्थिक दँय् अनुमति पत्र काःगु दकलय् तःधंगु आयोजना खः । रसुवाय् दयेकीगु थ्व आयोजना नेपाल वाटर एण्ड इनर्जी डेभलपमेन्ट कम्पनीं प्रवद्र्धन यानाच्वंगु दु । थ्व आयोजनाया क्षमता २१६ मेगावाट दु । अथेहे १६० मेगावाट क्षमताया लाप्चे खोला जलविद्युत आयोजनां नं मत उत्पादन यायेगु अनुमति काःगु दु । नाशा हाइड्रोपावर कम्पनीं प्रवद्र्धन यानाच्वंगु थ्व आयोजना दोलखाय् लाः ।
अथेहे चालु आर्थिक दँय् अनुमति काःगु आयोजना मध्ये ५० मेगावाटया मेवा खोला, ३८ मेगावाटया निलगिरि खोला, ४० मेगावाटया सुपर न्यादी, ५० मेगावाटया मस्र्याङदीबेसी व ४५ मेगवाटा कसुवा खोला आयोजना लाः । थुगुसी हे अनुमति काःगु १०० मेगावाटया त्रिशुली जलविद्युत आयोजना चितवनया दारेचोकय् लाः ।चिचिधंगु आयोजनाय् ५ मेगावाटया बुकु, ३.५ मेगावाटया सेती खोला, ४.८ मेगावाटया पदमखोला, १.४ मेगावाटया तल्ला सेलाङ व १.५ मेगावाटया स्ुट खोला लाः ।
स्वतन्त्र ऊर्जा उत्पादकतय् संस्था इपानया कथं मत उत्पादन अनुमति काःगु अप्वः धयाथें आयोजना दयेकेगु चरणय् दु । इपानया अध्यक्ष शैलेन्द्र गुरागाईँया कथं ३ हजार ५०० मेगावाट क्षमताया आयोजना थीथी चरणय् थ्यनाच्वंगु दुसा ५ हजार मेगावाट क्षमताया आयोजना मत न्याइगु सम्झौता (पिपिए) पियाच्वंगु दु । सरकारं झिदँया दुने १७ हजार मेगावाट मत उत्पादन यायेगु लक्ष्य तयातःगु दु । थुकी विद्युत प्राधिकरणं ३ हजार मेगावाट तक न्हापांगु चरणय् पिपिए यायेगु तयारी यानाच्वंगु दु । प्राधिकरणं खुसिया बहावय् निर्भर जूगु स्वयां पुखू दयेकातःगु व अर्धजलाशय आयोजनायात प्राथमिकता बियाच्वंगु दु ।
सरकारं २०७२ फागुन ६ गते जारी याःगु ऊर्जा संकटकालीन कार्ययोजनाय् मुक्कं मत उत्पादनपाखे ३० प्रतिशतति जक खुसिया बहावय् आधारित योजनाया पिपिए यायेगु खँ न्ह्यथनातःगु दु ।अथेहे विभागं गुंगू प्रशारण लाइन दयेकेगु निंतिं चालु आवया खुला दुने अनुमति बिउगु दु । १३२ केभी क्षमताया नयाँ मोदी लेखनाथ व कुशाहा विराटनगर १३२ केभी क्षमताया प्रसारण लाइन थुकी दुथ्याः । अथेहे कापडीगाड ३३ केभी, माथिल्लो खोरुङ्गा ३घ केभी, बागमति कुलेखानी ६६ केभी, तामाकोशी –येँ ४०० केभी, चौतारो लामोसाँघु ३३ केभी व माथिल्लो हेवा खोला ३३ केभी क्षमताया प्रसारण लाइन निर्माणया निंतिं विभागं अनुमति काःगु दु । विभागपाखें आःतक ९२ गू प्रशारण लाइन दयेकेगु अनुमित बीधुंकूगु दु ।
LEAVE YOUR COMMENTS