थौं ल्हुतिपुन्हिया जात्रा

येँ – थौं ल्हुति पुन्हि । बालाजुया नीनिधाः हितिइ म्वः ल्हुइगु लिसें जामाचोय् वनाः चीभाः दर्शन यानाः ल्हुति पुन्हि याइगु चलन दु । विशेष यानाः तामाङ समुदायं थौं सुथय् जामाचो व अनं लिपा स्वयम्भूइ वनाः दर्शन याइ । अथे हे थौं बहनी म्हय्पि अजिमाया जात्रा जुइ । म्हय्पि थौं बहनी गमं थनाः हयेधुंकाः कन्हय् न्हिछि थीथी थासय् चाःहीकाः जात्रा याइ ।

अथेहे थनिंनिसें ऐतिहासिक व सांस्कृतिक नेवाः बस्ती सक्वय् नं बज्रयोगिनी द्यःया जात्रा शुरु जुइ । च्यान्हु तक न्यायेकीगु बज्रयोगिनी द्यःया जात्रा ३३०० दँ निसें न्ह्यानाच्वंगु विश्वास याना वयाच्वंगु दु । जात्रा याये न्ह्यः न्याम्ह थकालि गुर्जु सहित नगरवासी वनाः बज्रयोगिनी द्यःयात ध्यबा, ग्वय् व स्वयम्भू चैत्य छानाः निमन्त्रण यायेमाःगु परम्परा दु ।

जात्राया झ्वलय् बज्रयोगिनीयात सक्वया बजारय् हयाः जात्रा याइ । उगु इलय् बज्रयोगिनीया लिसें सिंहनी, व्याघ्रिनी व स्वयम्भू चैत्य सक्व बजारय् हयाः जात्रा याइगु खः । द्यःपिं कुहां बिज्याइबलय् सक्वया लप्सीफेदी, पालुबारी, गागलफेदी, इन्द्रायणी व चाँगु लगायत न्हय्गू गामय् न्हय्न्हु तक बुँज्या याये मजिउगु चलन दु । जात्रा प्रत्येक दँय् प्यंगू त्वाःया स्थानीयवासी पालंपाः सञ्चालन यायेगु परम्परा दु ।थ्वहे झ्वलय् कंस आइतवाः यलय् बुंगद्यःया न्हवं यायेत्यंगु दु । न्हवं धुनेवं बुंगद्यःया जात्रा नं शुरु जुइ ।