नेवाः सांस्कृतिक ज्ञानकोष अनलाइनय्
सच्छि व खुइन्हय्गू भासं ब्वनेफइगु, मोबाइलय् नं डाउनलोड जुइगु
येँ (नेपालभाषा टाइम्स) – नेवाःतय् ज्ञानया धुकू कथं कयातःगु नेवाः सांस्कृतिक ज्ञानकोषया अनलाइन संस्करण (https://newagyankosh.org) या पितब्वज्या जूगु दु । नेपालभाषा एकेदेमिं पिथंगु ज्ञानकोषया अनलाइन संस्करण येँ महानगरपालिकाया कार्यवाहक प्रमुख सुनिता डंगोलं आइतवाः छगू ज्याझ्वःया दथुइ पितब्वज्या यानादीगु खः ।
सफू कथं पिहांवःगु नेवाः ज्ञानकोषया न्यागुलिं ब्वयात अनलाइनय् दुथ्याकेगु ज्या जूगु खः । अनलाइनय् नेवाः भाय् लगायत हलिंन्यंकया सच्छि व खुइन्हय्गू भासं ब्वनेफइगु खँ धाःगु दु । अथे हे डिजिटाइज जुयाच्वंगु च्वसु ब्वनेगु जक मखु, ब्वने म्हाःसा न्यने नं फइ । अनलाइनय् देवनागरीया नापं रञ्जना व नेपाल लिपिं नं लिपि हिइका ब्वने जिउगु व्यवस्था यानातःगु दु । थ्व नापं च्वसु चीहाकयेक ब्वने माःसा संक्षेपीकरण याये जिउगु एआई प्रविधि नं अनलाइनय् दुथ्याकातःगु दु ।
ज्याझ्वलय् ज्ञानकोषया अनलाइन नापं मोबाइल भर्सनया नं पितब्वज्या जूगु दु । आःयात एन्ड्रोइडय् जक डाउनलोड यानाः स्वयेफइगु जूसां छवाः लिपा आइओ एसय् नं उपलब्ध जुइगु खँ धाःगु दु ।
ज्याझ्वलय् मूपाहाँ येँ महानगरपालिकाया कार्यवाहक प्रमुख सुनिता डंगोलं नेवाः संस्कृतिया ख्यलय् थ्व छगू तःधंगु महत्वपूर्ण ज्या जूगु धयादिल । कावा प्रमुख डंगोलं अनलाइनय् नेवाः ख्यःया विषय वस्तुत मेमेगु भाय् व लिपिपाखें ब्वनेदइगु धयागु तसकं उपलब्धीपूर्ण ज्या जूगु बिचाः तयादिल ।
अथे हे ज्याझ्वलय् अनलाइन नेवाः ज्ञानकोष योजनाया प्राविधिक कजि नापं एकेडेमिया प्राज्ञ परिषद्या दुजः डा. ऐलेन बैलोचन तुलाधरं डिजिटल संस्करणय् दुथ्याःगु विषयवस्तुया बारे कनादिल । अनलाइनय् ज्ञानकोषया न्यागुलिं सफू दुथ्याःगु विषयत डिजिटाइजेशन यायेगु ज्या जक जूगु मखुसे मेमेगु प्राविधिक विधियात नं दुथ्याकेगु ज्या जूगु खँ प्राविधिक कजि तुलाधरं कनादिल ।
वय्कलं डिजिटाइज यायेगु ज्या नापनापं भाय् हिलेगु ट्रान्सलेसन इन्जिन व आखःयात ब्वने फइगु टेक्सट टु स्पीच प्रविधि नं थःपिंसं हे विकास यानाः थुकी दुथ्याकाःगु खँ न्ह्यथनादिल ।
नेपालभाषा एकेडेमिया चान्सलर नापं ज्ञानकोषया परिकल्पनाकार मल्ल के . सुन्दरं ज्ञानकोषयात डिजिटाइज यायेत डा. एलेन बैलोचन तुलाधरं तसकं तःधंगु योगदान बियादीगु खँ धयादिल । अथे हे वय्कलं ज्ञानकोषया परिकल्पना यानागु दिं लुमंकुसें थुकीयात आर्थिक रुपं ग्वहालि याःगु येँ महानरपालिकाया कुतःयात नं च्वछायादीगु खः ।
एकेडेमिया भाइस चान्सलर डा. पुष्पराज राजकर्णिकारं लसकसु यानादीगु ज्याझ्वःयात दांभरी वीर प्रसाद भंसारीं सुभाय् देछानादीगु खः ।ज्ञानकोषया अनलाइन परियोजना येँ महानगरपालिकाया आर्थिक ग्वाहालिं जूगु खः ।
LEAVE YOUR COMMENTS