ने. सं. ११४६ अनलाथ्व नवमी -

प्रम ओली व टिचिङया डाक्टरतय् हाथ्याया न्हि

येँ – प्रम केपी शर्मा ओलीया जलस्यँया निक्वःगु प्रत्यारोपण थौं जुइत्यंगु दु । नेपाःया हे टिचिङ अस्पतालय् नेपाःमि डाक्टरतय्गु हे पुचलं थ्व ज्या यायेत्यंगु खः । थुकी प्रम ओलीया हे इनाप कथं भारतय् वय्कःया न्हापांगु जलस्यँ प्रत्यारोपण याःम्ह डा. अनन्तकुमार छम्ह डाक्टरयात दुथ्याकेत्यंगु दु ।

नेपालय् निक्वःखुसी जलस्यँ प्रत्यारोपण याःपिं झिम्ह विरामी दयेधुंकल । उपिं सकस्यां अपरेशन सफल जूगु खःसां प्रम ओली धाःसा वंगु छुं ई न्ह्यवंनिसें थीथी कथंया ल्वचं ग्रस्त जुयाच्वंगु कारणं वय्कःया हकय् धाःसा पूर्ण रुपं ढुक्क जुइ मफइगु खँ धाःगु दु । खतुं थज्याःगु अपरेशनय् असफल जुइगु सम्भावना केवल ३.५ प्रतिशत जक दइगु खँ चिकित्सकतय्सं धाःगु दु ।

प्रम ओलीया शरीरय् यक्व ल्वय् दुसां वय्कःया आत्मबल धाःसा यक्व बल्लाःगु कारणं उकिं नं ज्या याइगु खँ चिकित्सकतय्सं धाःगु दु । अथे खःसां गुलिस्यां थ्व अपरेशन सफल जूसां प्रम ओली न्हापा थें सक्रिय जुइत धाःसा थाकुइफुगु अनुमान नं याःगु दु ।

वय्कःया निक्वःगु जलस्यँ प्रत्या–रोपणयात देय्या चिकित्सा ख्यलं नं महत्वपूर्ण घटनाया रुपय् कयाच्वंगु खँ म्हीग प्रम ओली अस्पताल भर्ना जुइगु जुल धायेवं अन मुनाच्वंपिं डाक्टर व पत्रकारतय् भीडं नं क्यंगु खँ धाःगु दु । थौं व कन्हय्या निन्हु स्वयम् प्रम ओली व टिचिङया डाक्टरतय् लागिं समेत तःधंगु हाथ्यां जाःगु न्हि जुइगु खँ नं धाःगु दु । प्रम ओली अपरेशन लिपा म्होतिं नं न्हय्न्हु अस्पताल च्वने मालीगु व वयां लिपा नं छुं न्हि पूर्ण आरामय् च्वने मालीगु खँ धाःगु दु ।

प्रम ओलीं बियादीगु ‘सन्देश’ या अर्थ
प्रधानमन्त्री केपी ओलीं म्हीग अस्पताल भर्ना जुइ न्ह्यः देशवासीया नामय् यू ट्युब मार्फत जारी यानादीगु सन्देशयात राजनीतिक अर्थं नं व्याख्या याना हःगु दु ।

वय्कलं ‘म्हगसयात दथुइ त्वःताः जि अलप जुइ मखु’ धकाः धयादीगु खँपुयात राजनीतिक ख्यलं धाःसा वय्कः ‘थः न्ह्याक्व हे उसाँय् मदुसां नं पदं राजीनामा बियाः आराम काये मखु’ धाःगु अर्थय् व्याख्या याना हःगु दु । अपरेशन लिपा प्रम ओलीं हानं राजकाजया ज्या याये फइ ला धइगु न्ह्यसः तयाच्वंपिंत लिसः बी कथं प्रम ओलीं थ्व सन्देश जारी यानादीगु अनुमान नं राजनीतिक ख्यलं यानाहःगु दु ।