ब्राजिल विश्वकपया निंतिं छनोट

एजेन्सी÷ ब्राजिल कतारय् आकिवं जुइगु फिफा विश्वकपया निंतिं छनोट जूगु दु । दक्षिण अमेरिकी छनोट अन्तर्गत शुक्रवाः सुथय् जूगु कासाय् ब्राजिलं कोलम्बियायात १–० गोलं बुकाः विश्वकपय् थाय् दयेकूगु खः । ब्राजिलया निंतिं नेयमारया पासय् लुकास पक्केटा गोल याःगु खः ।

छनोट चरणय् ब्राजिल छगू नं कासा बूगु मदुनिसा छनोटया खुगू कासा म्हिते ल्यंदनि । छनोटया ११ गू कासा त्याकूगु ब्राजिलं छगुली बराबरी म्हितूगु खः । दक्षिण अमेरिकां विश्वकपया निंतिं छनोट जूगु ब्राजिल न्हापांगु टिम खः । थ्वयां न्ह्यः युरोपं जर्मनी व डेनमार्क विश्वकपया निंतिं छनोट जुइधुंकूगु दु ।

दक्षिण अमेरिकी छनोट अन्तर्गत शुक्रवाः जूगु मेगु कासाय् चिलीं पाराग्वेयात १–० गोलं बुकूगु दुसा इक्वेडरं भेनेजुएलायात १–० गोल हे बुकूगु दु । अथे हे छनोटया मेगु कासाय् पेरुं बोलिभियायात ३–० गोल बुकूगु दु । थ्व पुचलय् ब्राजिल शीर्ष थासय् दुसा निगूगु थासय् अर्जेन्टिना, स्वंगूगु थासय् इक्वेडर व प्यंगूगु थासय् चिली दु । शीर्ष प्यंगू टिम विश्वकपय् छनोट जुइ ।

विश्वकप छनोट अन्तर्गत युरोपियन छनोटय् बिहिवाः चान्हय् जूगु कासाय् जर्मनी, क्रोएसिया, रसिया व स्पेन त्याःगु दु । अथे हे पोर्चुगलं आयरल्याण्डलिसे गोलरहित बराबरी म्हितूगु दु । बिहिवाः चान्हय् जूगु कासाय् जर्मनीं लिचेस्टाइनयात ९–० गोलं, क्रोएसियां माल्टायात ७–१ गोलं, रसियां साइप्रसयात ६–० गोलं व स्पेनं ग्रीसयात १–० गोलं बुकूगु खः । अथे हे जर्जियां स्वीडेनयात २–० गोलं बुकल ।

सम्बन्धित बुखँ

LEAVE YOUR COMMENTS