चेल्सी लिगया स्वंगूगु थासय्

वेष्ट ह्यामयात बुकाः चेल्सी इंग्लिस प्रिमियर लिगया स्वंगूगु थासय् थहां वःगु दु । चेल्सीं थःगु घरेलु मैदानय् वेष्ट ह्यामयात २–० गोलं बुकूगु खः । चेल्सीपाखें उत्कृष्ट कासा म्हितूम्ह इडेन हजार्डं निगुलिं गोल याःगु खः । हजार्डं न्हापांगु हाफया २४ औं मिनेटय् न्हापांगु गोल यानाः चेल्सीयात अग्रता बिउगु खः । निगू हाफया ९० औं मिनेटय् हजार्ड व्यक्तिगत निगूगुु गोल यासें चेल्सीयात विजय चूलाकाबिउगु खः ।

थ्व विजय लिपा ल्याः धखलय् न्यागूगु थासय् लानाच्वंगु चेल्सी स्वंगूगु थासय् थहां वंगु दु । लिगया शीर्ष थासय् लिभरपुल दु । लिभरपुल स्वयां छगू कासा म्हो म्हितूगु म्यानचेस्टर सिटी निगुगू थासय् दुसा स्वंगूगु थासय् थहांवःगु चेल्सी स्वयां छगू कासा म्हो म्हितूगु टोटनह्याम व आर्सनल छसिकथं प्यंगूगु व न्यागूगु थासय् दु ।