अफ्रिकी फुटबल कासामित बिचल्लीइ

येँ (नेपालभाषा टाइम्स) – नेपालय् व्यावसायिक फुटबल म्हितेत वयाच्वंपिं अफ्रिकी कासामित बिचल्लीइ लानाच्वंगु दु । कोरोना भाइरसया महामारी लिपा फुटबल गतिविधि मजूगु कारणं आम्दानी मदयाः उमित नये–त्वनेत तकं समस्या जुयाच्वंगु खँ धाःगु दु । नेपालय् कोरोना संक्रमणया कारणं वंगु चैतय्ल कडाउन यायेधुंकाः अन्तर्राष्ट्रिय उडान नं बन्द यानातःगुलिं उपिं थःगु देशय् लिहां नं वनेमफयाच्वंगु खँ धाःगु दु ।

बिचल्ली लानाच्वंपिं अफ्रिकन कासामितय्त छुं न्हि दशरथ रंगशालाय् एन्फा एकेदेमिया न्हापांगु ब्याचया कासामिपिंसं समस्याय् लानाच्वंपिं फुटबल कासामिपिंत ग्वाहालि बिउगु खः । अन ग्वाहालि कायेत जक स्वीन्याम्हं मल्याक अफ्रिकन कासामित थ्यंगु खः । उमिसं थःपिं बालं च्वनाच्वनागु थाय्या बाः तकं पुले मफयाच्वंगु खँ धाःगु दु। थन ग्वाहालि काःवःम्ह आइभोरी कोस्टया कासामि फ्लोरेन्टकोरो कासामितय् समस्या कासामिपिंसं हे जक थूगु धासें लसता प्वंकूगु खः ।

नेपालय् नाइजेरिया, क्यामरुन, इजिप्ट, मोजाम्बिक, तान्जिानिया लिसें थीथी अफ्रिकन देय्या कासामित ए डिभिजन लिग म्हितेत वयाच्वंगु दु । एन्फाया नियम कथं कासा क्वचायेवं उपिं लिहां वनेमाःगु खः, तर उपिं न्हापां निसें हे भिसा थप यानाः नेपालय् च्वनाः थनं हे भारत, भूटानय् नं कासा म्हितेत वनेगु याना वयाच्वंगु खः । तर थुगुसी कोरोनाया कारणं नेपाः जक मखु, भारत, भुटानय् नं फुटबल गतिविधि शून्य धयाथें जूबलय्उ पिं समस्याय् लाःगु खः । भुटानय् ला आवंलिं विदेशी कासामि म्हितकेमदइगु नियम तकं हयेधुंकूगु दु ।

नेपालय् धाःसा ए डिभिजन लिगय् छगू क्लबं प्यम्ह तक विदेशी कासामि तयेदइसा उपिं मध्ये छम्ह दक्षिण एशियाली जुइमाःसा मेपिं स्वम्ह न्ह्यागु देय्यापिं जूसां जिउ । अफ्रिकन कासामित दंगु भावं लाइगु व उपिं नेपाली फुटबलस्तरयात ल्वःपिं जूगुलिं नेपालय् फुक्क धयाथें क्लबतय्सं अफ्रिकन कासामितय्त म्हितका वयाच्वंगु दु । थुगुसी अफ्रिकन कासामि हयातःपिं क्लबतय्सं नं थः कासामितय्त वास्ता मयाःगुलिं थज्याःगु समस्या वःगु खँ धाःगु दु ।

सम्बन्धित बुखँ

LEAVE YOUR COMMENTS