विश्व बैंकयात सुख्खा बन्दरगाहया बोधार्थ

येँ – चोभार संरक्षण समितिं सुख्खा बन्दरगाह दयेकीगु साइट अफिस इन्टरमोडल यातायात विकास समितिइ लःल्हाःगु गुनासो सहितया मागपत्रया बोधार्थ विश्व बैंकया नेपाः प्रतिनिधिपिंत नं लःल्हाःगु दु ।

विश्व बैंकया प्रतिनिधि कुमार व आकाश श्रेष्ठयात उगु बोधार्थ लःल्हाःगु खः । बोधार्थ लःल्हानाः कासें विश्व बैंकया प्रतिनिधिपिंसं चोभाःया समस्या मज्यंकं थःपिंसं थुकी लगानी मयायेगु आश्वासन नं संरक्षण समितियात बिउगु खँ समितिया अध्यक्ष पञ्चलाल महर्जनं ‘नेपालभाषा टाइम्स’ यात कनादीगु दु ।

स्थानीय वासिन्दाया समस्या प्रति थःपिं सचेत जूगु धासें थःपिंसं थ्व खँ नेपाः सरकारयात नं जानकारी याके धुनागु व आः सरकार गुगु प्रक्रियां न्ह्याः वनी विश्व बैंक नं उगु प्रक्रिया स्वयाः जक न्ह्याः वनेगु आश्वासनं संरक्षण समितियात विश्व बैंकया प्रतिनिधिपिंसं बिउगु दु ।

चोभार संरक्षण समितिं चोभारय् सुख्खा बन्दरगाह दयेकेगु ज्या जुल धाःसा अन वातावरणया विनाश जुइगु व गुकिं यानाः देय्यात हे तःधंगु घाटा जुइगु धासें अन सुख्खा बन्दरगाह मदयेकेत इनाप याना वयाच्वंगु खः ।

अथे हे संरक्षण समितिं बोधार्थ प्रतिलिपि येँ जिल्ला प्रशासन ज्याकूया प्रमुख जिल्ला अधिकारी रामप्रसाद आचार्य, उद्योग, वाणिज्य तथा आपूर्ति मन्त्रीया स्वकीय सचिव जित कर्णयात नं लःल्हाःगु दु ।

संरक्षण समितिं येँ महानगरीय प्रहरी परिसरया प्रमुख बसन्त लामायात नं उगु बोधार्थ पौ बीगु कुतः याःगु खःसां वय्कलं धाःसा पौ बुझे यायेत अस्वीकार याःगु खँ संरक्षण समितिया अध्यक्ष महर्जनं कनादीगु दु ।