वार्षिक कार्यक्रम प्रभावकारी कार्यान्वयन यायेत इनाप

येँ -येँ महानगरपालिकाया प्रमुख विद्यासुन्दर शाक्यं महानगरया वार्षिक कार्यक्रम प्रभावकारी रुपं कार्यान्वयन यायेत इनाप यानादीगु दु । महानगर प्रमुख शाक्यं विभागीय प्रमुखतलिसे सहलह यायेगु झ्वलय् उकथं वार्षिक कार्यक्रम प्रभावकारी कार्यान्वयन यायेत इनाप यानादीगु खः ।

महानगर प्रमुख शाक्यं जनप्रतिनिधिं नगरसभापाखें पारित नीति तथा कार्यक्रमया प्रभावकारी कार्यान्वयनय् कर्मचारीतय् भूमिका अप्वयेकेमाःगु खँय् नं बः बियादिसें कार्यक्रम कार्यान्वयनय् कर्मचारीया सक्रियता अप्वइगु अपेक्षा थम्हं यानागु दु धयादिल ।

‘विभाग सक्रिय मजुल धाःसा गुगुं नं ज्या मजुइगु जक मखु, याःगु ज्या नं ताःलाइमखु’, प्रमुख शाक्यं धयादिल, ‘जनप्रतिनिधिं तयार याःगु कार्यक्रमयात गन्तव्यतक थ्यंकेगु लक्ष्य दयेकाः कार्यान्वयनया कार्यक्रम दयेकादिसँ ।

सहलहया इलय् वय्कलं सम्पन्न जूगु कार्यक्रम व उकिया लाभया विषययात कयाः समीक्षा यायेमाःगु, कार्यान्वयनय् वये मफुगु कार्यक्रम छाय् न्ह्याये मफुत धइगु नं कारण माले माःग धासें महानगर थम्हं आन्तरिक रुपं याये फुगु ज्या खुरुखुरु याना यंकेगु स्वयेमाः धयादिल ।

उगु इलय् महानगर उपप्रमुख हरिप्रभा खड्गी श्रेष्ठं जनप्रतिनिधि व कर्मचारीया सुमधुर सम्बन्धं जक महसुस याये फइकथंया लिच्वः पिहां वइ धासें सकसिनं थःथःगु पदीय दायित्व पूरा यायेगु खत धाःसा सुनानं सुयात न्ह्यसः थनेमाःगु अवस्था नं वइमखु धयादिल ।

प्रमुख प्रशासकीय अधिकृत राजेश्वर ज्ञवालीं कार्यायोजनाया सफल कार्यान्वयनं थःगु मूल्यांकनय् नं ग्वाहालि याइ धासें विभागं याइगु ज्यायात कार्ययोजनाया आधार कार्यान्वयनय् यंकेत इनाप यानादिल ।

उगु इलय् महानगरया नकतिनि क्वचाःगु गुक्वःगु अधिवेशनं स्वीकृत याःगु वार्षिक कार्यक्रमयात सम्बन्धित विभागं गबलय् शुरु यायेगु व गबलय् तकया दुने क्वचायेकेगु लक्ष्य क्वःछिनाः चौमासिक अवधि तयाः कार्ययोजना नं दयेकूगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु