वडाया दुजःतय्त नं वरियता माल

यँे – सरकारं छुं ई न्ह्यः जारी याःगु सरकारी पदाधिकारीतय्गु वरियताक्रम मिले मजू धकाः उच्चस्तरीय पदाधिकारीतय्सं असन्तोष प्वंका हे च्वंगु इलय् येँ महानगरपालिकाया वडा सदस्यतय्सं नं उगु वरियताक्रमयात कयाः थःपिनि चिउताः प्वंकूगु दु ।येँ मनपाया फुक्कं वडाया सदस्यतय्सं मनपा अन्तर्गया सकलें वडाया अध्यक्ष व सदस्यतय्त नं थ्व वरियताक्रमय् समावेश यायेमाःगु माग याना हःगु दु ।

सरकारी जारी याःगु वरियताक्रमय् देय्या थीथी नगरपालिकाया मेयर व उपमेयरयात जक समावेश यानाः वडा अध्यक्ष व सदस्यतय्त वेवास्ता यानातःगु दु । उकिं गनं वनेबलय् राज्यपाखें मेयर व उपमेयरतय्त स्थान व्यवस्था याःसां वडा अध्यक्ष व सदस्यतय्त धाःसा अज्याःगु व्यवस्था याइ मखु । उकिं थःपिंत मछिंगु अवस्था वयाच्वन धासें उमिसं राज्यं दयेकूगु वरियताक्रमय् वडा अध्यक्ष व सदस्यतय्त नं समावेश याकेगु बारे राज्यया ध्यानाकर्षण यायेत येँ मनपाया नगरसभाय् नकतिनि प्रस्ताव दर्ता याःगु खः ।

नगरसभाया अध्यक्षता यानादीम्ह मेयर विद्यासुन्दर शाक्यं थुकिया बारे अध्ययन यानाः निर्णय यायेत २३ वडाया अध्यक्ष मचाराजा महर्जनया अध्यक्षताय् छगू कार्यदल गठन यानादीगु दु । वडा सदस्य–तय्सं वडाया ज्याय् थःपिनिगु अधिकार अप्वयेकेमाःगु माग नं याःगु दु ।