भ्रष्टाचार व राजनीतिक पूर्वाग्रह मुक्त वडा प्रशासन न्ह्याकेगु जुइ

चुनावय् छिगु मुख्य एजेन्डा छु खः ?
जिगु चुनावी एजेन्डा धयागु भ्रष्टाचार व राजनीतिक पूर्वाग्रह मुक्त वडा प्रशासन न्ह्याकेगु, प्रशासनया ज्या अःपुक व याउँक जुइगु यानाः व्यवस्था यायेगु, विकास निर्माण, योजना कार्यान्वयनय् जनसहभागिता, अनुगमन, निरीक्षण नापं आर्थिक पारदर्शिता तयेगु, फोहरमैलाया समस्या ज्यंकेत थीथी योजना कार्यान्वयन यायेगु, त्वाःबहाः, चुक, ननी, बहाः, बही व लँय् फोहर खनेमदयेकेत विशेष योजना हयेगु, नेपाल लिपि, नेपालभाषा, साहित्य, संस्कृतिया संरक्षण व उत्थान यायेगु, वडाबासीया मुद्दा मामिला वडाय् हे ज्यंकेत मेलमिलाप केन्द्र गठन यानाः ज्या न्ह्याकेगु, वडायात पर्यटकीय व्यापारिक क्षेत्र दयेकेत ज्या न्ह्याकेगु, बँपसः व ट्राफिक व्यवस्थापन यायेगु खः ।

छिगु वडाय् दुगु मुख्य समस्या छु ?
२० वडाया मू समस्या धयागु फोहरमैला, ट्राफिक जाम, बँपसः, धः मंगाः आदि खः ।

छि निर्वाचित जुयादी धयागु छु आधार दु ?
जि २०३६ सालंनिसें भाषिक व सामाजिक ख्यलय् व वडाया विकास निर्माणलिसें वडावासीपिंत सेवा बिइगु ज्याय् निरन्तर ज्या याना वयाच्वनाम्ह खः । थुकिं यानाः वडावासीपिनि दथुइ जि परिचित हे दु । थुकिया लिसें थीथी संघसंस्थाय् युवा नेतृत्व विकासया नितिं अग्रसर जुयाः युवातय्गु दथुइ ज्या यानाच्वनागु दुसा भाषिक संस्था न्हू पुचःया संस्थापक दुजः, काष्ठमण्डप सामुदायिक अध्ययन केन्द्रया नायः, जातीय संस्था स्थापित खलःया वर्तमान न्वकू, सामाजिक संस्था दे भ्वय् छेँया छ्याञ्जेलिसें थीथी संघसंस्थाय् आबद्ध जुयाच्वनागु दु । थुकिया लिसें थुगुसी जि स्वंगू दलया समर्थन प्राप्त जुयाः गठबन्धनपाखें उम्मेदवार बियागु दु । थुपिं आधारं जि त्याइ धयागु विश्वास दु ।

निर्वाचित जुया वयेधुंकाः न्हापां छु यानादी ?
जिगु प्राथमिकता धयागु ज्येष्ठ नागरिक समाज गठन यानाः ज्येष्ठ नागरिक दिवा सेवा न्ह्याकेगु, विष्णुमती खुसि सरसफाइया नितिं कार्ययोजना हयाः ज्या न्ह्याकेगु, रामघाट–परोपकार–त्वाःछेँ मार्गयात पर्यटकीय प्रवेश मार्गया रूपय् विकास यानाः समग्र वडायात पर्यटकीय व्यापारिक केन्द्र दयेकेत पहल यायेगु, कासाख्यःया संस्थातय्त आत्मनिर्भर यानाः राष्ट्रिय स्तरया खेलाडी उत्पादन यायेत क्रियाशील जुइगु, नाटक, साहित्य, कला थुज्वःगु क्षेत्रय् युवावर्गयात प्रोत्साहित यायेगु, सामुदायिक ब्वनेकुथियात ईकथं ल्वयेक साधनस्रोत सम्पन्न दयेकाः शिक्षाया गुणस्तर विकास यायेगु, अनिवार्य स्वास्थ्य बीमा योजना कार्यान्वयन यायेगु, देगः, सतः, ल्वहँहिति, संरक्षणया लिसें ल्वहँहितिया मुहान व मंगाःयात भिंकेगु, स्थानीय भाषा, कला, संस्कृतिया उत्थानया नितिं जिगु ग्वसा दु ।

भाषा, कला, संस्कृतिया निंतिं छु योजना दु ?
येँ २० वडा दुने च्वंगु विभिन्न जातजातिया थीथी बाजं थाइगु दु । गुलिखे बाजंत तनावना च्वंगु खनेदु । तनावंगु बाजंयात हानं व्यवस्थापन यायेगु व मगाःमचाःगु बाजंत लिसें थीथी जातिया सांस्कृतिक रीतिथिति उत्थानया नितिं दुग्यंक ग्वाहालि यायेगु । लिसें वडाय् नेपालभाषां निवेदन बिइकेत प्रोत्साहन यायेगु । भाषाख्यःया खलःपुचःयात नेपाललिपि कक्षा सञ्चालन लिसें अभियन्ता दयेकेत ग्वाहालि यायेगु जुइ ।