सक्व मेलाय् कडा सुरक्षा व्यवस्था

वंगु माघ ७ गते सोमवाःनिसें सक्वय् शुरु जूगु लछियंकंया हिन्दू धर्मावलम्बितय् श्रीस्वस्थानी व्रतया धलः दनेगु व नादिखुसि (शालीनदी) मेलाय् वइपिनिगु निंतिं सुरक्षायात ध्यानय् तयाः ९० म्ह प्रहरी परिचालन यानातःगु दु । मेलाय् जुइ फइगु आपराधिक गतिविधि नापं लुटपाटया घटना नियन्त्रणया निंतिं धासें सादा वसतय् प्रहरीया पुचः परिचालन यानागु महानगरीय प्रहरी प्रभाव सक्वया प्रहरी निरीक्षक लक्ष्मी खनालं जानकारी बियादिल ।

नादिखुसिइ स्वस्थानीया इलय् धलं दनीपिं व अन वइपिं भक्तजनत म्वःम्वः हे दयाच्वनी । उकिया हे लबः कायेकथं खुइगु व लुटपाटया ज्याय् संलग्न पुचःत नं सक्रिय जुइ फु धासें खनालं कडा निगरानीसहितया मिसा प्रहरी पुचःतकं परिचालन यानागु दु धयादिल ।लछियंकं न्ह्याइगु मेलाय् देगः परिसर दुने चछिन्हिछिं खटे जुइत स्वीम्ह प्रहरी परिचालन यानातःगु दु ।

बहनिसिया इलय् जुइ फुगु घटनाया चुनौतियात ध्यानय् तयाः छचाःयंकं हे प्रहरी खटे यानातःगु खः । सुधार समिति, प्रहरी व स्थानीय जनतां मेलाय् वइपिं भक्तजन व चिचिधिकःपिं मस्त तनीगु जुइगुलिं सुरक्षा सहितया ‘हेल्प डेक्स’ नं तयातःगु दु । मेलाय् थीथी कथंया सामग्री व नसाज्वलंया अप्वः मू काये फइगु व म्हो गुणस्तरया नसाज्वलं विक्री वितरण सम्बन्धी जांच यायेत सक्व नगरपालिकाया प्रमुखया संयोजकत्वय् समितितकं गठन यानातःगु दु ।

अप्वः मू काइपिं व म्हो गुणस्तरया नसाज्वलं विक्री वितरण याःगु लुत धाःसा कारवाही यायेगु नगरपालिका प्रमुख सुवर्ण श्रेष्ठं कनादिल ।
सक्वया नादिखुसिइ लछियंकं जुइगु मेलाया इलय् जक स्वीगू लाखं मल्याक भक्तजन वइगु माधवनारायण स्वस्थानी व्रत तथा शालिनदी सुधार समितिया अनुमान दु ।

मेलाय् वइपिं भक्तजनत अप्वइगु दिनय् सार्वजनिक यातायात बहनिसिया ९ ताः इलय् तक संचालन यायेगु व्यवस्था मिले यानागु समितिया अध्यक्ष गोविन्द श्रेष्ठं जानकारी बियादिल । मेलाय् वइपिं सर्वसाधारणयात लाक्वपाक्व भाडा काइगु धइगु खँ वयाच्वंगुलिं श्रेष्ठं सार्वजनिक यातायातय् भाडादर तकं तिकेगु बियाच्वनागु धयादिल ।

मेलाय् स्वीगू लाखं मल्याक भक्तजन वइगु माधवनारायण स्वस्थानी व्रत तथा शालिनदी सुधार समितिया अनुमान दु । मेलाय् वइपिं भक्तजनत अप्वइगु दिनय् सार्वजनिक यातायात बहनिसिया ९ ताः इलय् तक संचालन यायेगु व्यवस्था मिले यानातःगु दु ।

मेलाय् वइपिनिगु निंतिं पार्किंग, पुजारी व्यवस्थापन, सुचुकुचु व सुरक्षाया व्यवस्था मिले यानातःगु दु । थ्व लछियंकं स्नान यानाः स्वस्थानी व माधवनाराणया पुजार्अचनायात धाःसा पुण्य प्राप्त जुइ धइगुजनविश्वासलिसें स्वनिगः व स्वनिगःपिनेया थीथी जिल्लापाखें नं आपालं भक्तजनत वइगु समितिं न्ह्यथंगु दु ।

स्वस्थानी धलं दनेगु व माधवनारायणया अप्सं च्वनेगुयात कठोर व्रतया रुपय् कयातःगु दु । स्वस्थानी पुराणय् वर्णन यानातःगु लावण्य देय् धयातःगु थौंया सक्व देशय् थ्व लछियंकं तःधंगु मेला जुइ । दँय्दसं पोहेलाथ्व पुन्हिनिसें सिल्लाथ्व पुन्हि लछियंकं थ्व अवधिइ छेँय्छेँय् स्वस्थानीया बाखं कनेगु व न्यनेगु नं याइ ।

स्वस्थानीया बाखं कनेगु, न्यनेगु, अप्सं च्वनेगु यात धाःसा मनोकांक्षा पूरा जुइ धइगु धार्मिक विश्वास दु । स्वस्थानीया व्रत च्वनीपिंसं थ्व लछितक चि, न्या, ख्यें, ला, मरमसला नये मजिउ, झंगःपछि, जनावर थी मजिउ, लाकां–मोजा न्ह्याये मजिउ, थी मजिउ जूपिं मिसा नापं लाकां, चप्पल न्ह्यानातःपिं सुयात नं नाप लायेगु व थी तकं मजिउ ।

व्रत च्वनीपिंसं थ्व लछितक दुरु, सिसाबुसा व लः बाहेकं मेगु छुं नं कथंया पेय पदार्थतकं त्वने मजिगु संस्कृतिविद् प्रा. डा. टेकबहादुर श्रेष्ठं धयादी । सिसाबुसाय् नं सन्त्रासि, तु, तरुल व सकि जक नयेमाः । नयाच्वँच्वं व्रत च्वनीपिं दथुइ हे दना वने मजिउ ।

थथे भोजन यानाच्वंम्ह व्रतालु दथुइ हे दना वनेबलय् नाप च्वंम्हेसित थिल धाःसा वं नं भेजन यायेगु त्वःतेमाः । भोजन यायां दना वने धुंकाः हाकनं वयाः नये नं मजिउ । नये ज्वलं ज्वरे यायेबलय् व भोजन यायेबलय् व्रत मच्वंपिंसं थी मफइगु थासय् च्वनाः ज्वरे यायेमाःगु व नयेमाःगु नियम दु ।