बाहिरी चक्रपथय् चीनया रुची

येँ – बाहिरी चक्रपथ दयेकेगु बारे चिनियाँ कम्पनीं चिउताः प्वंकूगु दु । सरकारं ग्वसाः ग्वःगु लगानी सम्मेलनय् चिनियाँ पुचलं उगु चिउताः प्वंकूगु खः । सम्मेलन लिपा चिनियाँ पुचलं बाहिरी चक्रपथ दयेकेगु निंतिं आवेदन बिउगु खँ सीदुगु दु । सम्मेलन लिपा बाहिरी चक्रपथ दयेकेगु नितिं आवेदन लायेवं सरकारं हाकनं इपीसीएफ मोडलय् दयेकेगु निंतिं कुतः याःगु खः । बाहिरी चक्रपथ दयेकेगु निंतिं सरकारया जक स्रोतं दयेके फइगु अवस्था मदयेवं सरकारं इपीसीएफ मोडलय् दयेकेगु तयारी यानाच्वंगु खँ मन्त्रालय स्रोतं धाःगु दु ।

सरकारयाके मुआब्जा बियाः बाहिरी चक्रपथ दयेकेगु निंतिं माक्व आर्थिक स्रोत मदुगुलिं इपीसीएफ मोडलय् दयेकेमाःगु खँ शहरी विकास मन्त्री मोहम्मद इस्तियाक राईं कनादीगु दु । वय्कःया कथं ल्याण्ड पुलिङपाखें जग्गा अधिग्रहण यानाः इपीसीएफ मोडलय् वने मफइगु खःसा आयोजना दयेके फइ मखु ।

बाहिरी चक्रपथय् चिनियाँतय्सं न्हापा नं चिउताः प्वंकाच्वंगु खः । तर सरकारं थ्व चक्रपथ थम्हं हे दयेकेगु ग्वसाः यानाच्वंगु खःसा भूमाफियाया कारणं आः सरकार याकःचां दयेके फइगु अवस्था मदुगु खँ धाःगु दु । भूमाफियातय्सं अलाइन्टमेन्ट क्षेत्रय् स्वंगू आना स्वयां म्हो क्षेत्रफलया जग्गा आपालं कित्ताकाट यानातःगुलिं सरकारं मुआब्जा बीत समस्या जुइगु जुयाः आः ल्याण्डपुलिङ यानाः जक दयेकेगु तयारी मन्त्रालयं यानाच्वंगु खँ धाःगु दु ।

भूमाफियातय्सं चिचीकूगु जग्गा कित्ताकाट याःगुलिं सरकारं अनया अलाइन्टमेन्ट हीकेगु तयारी याःगु खः । बाहिरी चक्रपथ दयेकेत डीपीआर तयार याःगु चाइना इन्जिनियरङ कर्पोरेशनं हे आः न्हूगु डीपीआर दयेकाः निर्माण समेत थःपिंसं हे यायेगु प्रस्ताव तःगु खः ।
मन्त्रालयं वंगु २०७४ सालया वैशाख १३ गते चोभाः–सतुंगल खण्डया ६.६१३ किलोमिटर सतक दयेकेगु धकाः प्रक्रिया न्ह्याकूगु खःसां आपालं जग्गा चिचीकू जुइक कित्ताकाट यानातःगु लुयावःगुलिं ज्या स्थगित जूगु खः । आः बाहिरी चक्रपथ दयेकेगु खःसा फुक्कं लागाय् छक्वलं हे निर्माण यायेगु योजना सरकारं दयेकाच्वंगु दु । उकिया निंतिं छक्वलं हे जग्गा अधिग्रहरण यायेगु तयारी यानाच्वंगु खँ सीदुगु दु ।