नेपाल कम्युनिष्ट पार्टी कट्टेलयागु जूगु फैसला

येँ – नेपाल कम्युनिष्ट पार्टी (नेकपा) धयागु नां आः प्रधानमन्त्री केपी ओली व प्रचण्ड–माधव निगुलिं पक्षयात मलाइगु जूगु दु । सर्वोच्च अदालतं आइतवाः नेकपा धयागु नां ऋषिराम कट्टेल खः धयागु फैसला न्यंकेवं थ्व नां निगुलिं पक्षयात मलाइगु जूगु खः ।

सत्तारुढ नेकपा दुने जुयाच्वंगु विवादया झ्वलय् पार्टीया नां व पार्टीया चुनाव चिं सुयागु खः धयागु विवाद जुयाच्वंगु खः । थ्व हे इलय् सर्वोच्च पार्टीया कट्टेलया जूगु फैसला न्यंकूगु खः । कट्टेलं २०७५ मंसिर १३ गते नेपाल कम्युनिष्ट पार्टी धयागु नां थःगु जूगु दावी यासें सर्वोच्चय् मुद्दा तःगु खः । उबलय् नेकपा (एमाले) व माओवादी मिले जुयाः नेकपा धयागु पार्टी दर्ता याःगु खः ।

आइतवाः न्यायाधीशपिं वमकुमार श्रेष्ठ व कुमार रेग्मीया इजलाशं नेकपा धयागु नां कट्टेलया जूगु फैसला न्यंकूगु खः । थ्व फैसला लिपा आः ओली व प्रचण्ड–नेपाल निगुलिं पक्षं पार्टीया नां नेकपा धकाः तयेमखनीगु जूगु दु ।

अथेहे निर्वाचन आयोगं नं आः याकनं हे सत्तारुढ नेकपां कयातःगु चुनाव चिं सूर्य सुयागु खः धयागु फैसला याइगु खँ धाःगु दु । निगुलिं पक्षया आधिकारिताया विवादय् थ्व मुद्दा आयोगय् थ्यनाच्वंगु खः । निगुलिं पक्ष दथुइ जुयाच्वंगु विवादया झ्वलय् आयोगं नं सूद्र्यः चिं हे खारेज यायेगु निर्णय यायेफुगु खँ पिहां वयाच्वंगु दु ।