‘नेपालमण्डल’ नां तयेत प्रस्ताव दर्ता

हेटौंडा । प्रदेश नम्बर ३ या नां ‘नेपालमण्डल प्रदेश’ तयेमाः धइगु माग यासें प्रदेश प्रदेश सभाय् प्रस्ताव दर्ता जूगु दु । जेठ १७ गते शुक्रवाः प्रदेश सभाया सभामुख सानु कुमार श्रेष्ठ समक्ष उगु प्रस्ताव लःल्हाःगु खःसा सभामुख श्रेष्ठं उकियात दर्ता प्रक्रियाय् छ्वयादीगु खः ।
प्रदेशया नां ‘नेपालमण्डल’ तयेत माग यासें दर्ता जूगु प्रस्तावया प्रस्तावकपिं प्रदेश सभाया सांसदपिं डा. अजयक्रान्ति शाक्य व बसन्त मानन्धर खः ।
उगु प्रस्तावयात सांसदपिं केशव स्थापित, राजेश शाक्य, ज्ञानेन्द्र शाक्य, राजकाजी महर्जन, प्रकाश श्रेष्ठ, उर्मिला श्रेष्ठ कर्माचार्य व सरस्वती बाटीपिंसं समर्थन यानादीगु खः ।
थ्व प्रस्तावया प्रस्ताव व समर्थकपिं सकलें सत्तारुढ दल नेपाल कम्युनिष्ट पार्टी (नेकपा) या सांसदत खः । थ्वहे प्रस्तावयात आः मेपिं सांसदपिनिगु नं समर्थन कायेगु लागिं कुतः जुयाच्वंगु खँ सीदुगु दु ।
प्रदेशया नां ‘नेपालमण्डल’ तयेमाः धकाः माग जक जुया वयाच्वंगु खःसा आः औपचारिक रूपं हे प्रस्ताव दर्ता जूगु खः ।
प्रस्तावय् प्रदेशया नां ‘नेपालमण्डल’ तयेमाःगुया कारण थुकिया ऐतिहासिक पक्ष, जनसंख्या आदिया खँ न्ह्यथनातःगु दु । लिसें उकी ‘नेपालमण्डल’ बाहेक मेमेगु नां छाय् उपयुक्त मजू धकाः नं स्पष्ट यानातःगु दु ।