स्टार पुत्रीतय् चर्चा

खस् नेपाली भाय्या संकिपा ख्यलय् लिपांगु इलय् न्हू न्हूपिं कलाकार धमाधम खने दयेकः वयाच्वंगु दु । खय्तला थ्व लिपांगु इलय् कलिउडयात न्हू न्हूपिं कलाकारतय्सं हे क्वबियाच्वंगु दु धकाः नं धायेगु याना हयाच्वंगु दु । थ्व झ्वलय् नेपाःया संकिपा ख्यःया स्टार कलाकारतय् म्ह्याय्पिं धमाधम संकिपा ख्यलय् पलाः न्ह्याकेगु क्रम अप्वया वयाच्वंगु दु ।

कलिउडय् स्टार कलाकारया म्ह्याय्पिनि चर्चा यायेबलय् स्टारपुत्री जानह्वी बस्नेत, निरिशा बस्नेत, सुहाना थापा, कविता मानन्धरया नां चर्चाय् वयाच्वंगु खनेदु । विगतय् खस् नेपाली भाय्या संकिपा ख्यलय् सदाबहार नायिकाकथं बय्बय् जुयाच्वंम्ह करिश्मा मानन्धरया म्ह्याय् कविता मानन्धरं ‘एउटा यस्तो प्रेम कहानि’ संकिपाय् नायिक जुयाः संकिपा ख्यलय् पलाः न्ह्याके धुंकूगु दु ।

अथे हे विगतय् नायिका लिपा निर्माता निर्देशक जुयाः पिलू वःम्ह झरना थापाया म्ह्याय् सुहाना थापा नं संकिपा ‘ए मेरो हजुर–३’य् नायिका जुयाः खने दयेकः वयेत्यंगु दुसा छगू इलय् कमेडि हिरोकथं तसकं बय्बय् जूम्ह नायक जयकिशन बस्नेतया म्ह्याय् जानह्वी बस्नेतं ‘सुब्बा साहेब’ संकिपाय् नायिका जुयाः अभिनय यायेधुंकूगु दु ।
अथे हे नांजाःम्ह नायकलिसें निर्माता निर्देशक विश्व बस्नेत व शारदा श्रेष्ठ बस्नेतया म्ह्याय् निरिशा बस्नेत नं ‘जानी नजानी’ नांया संकिपाय् नायिका जुयाः खने दयेकः वयेधुंकूगु दु ।

नायिका निरिशा बस्नेत कलिउड संकिपा ख्यलय् दुहां वये स्वयां न्ह्यः भारतीय टेलिभिजन च्यानलय् प्रशारण जूगु टेलिश्रृंखला ‘चन्द नन्दनि’इ नं अभिनय याये धुंकूगु दु धकाः धाइ । खय्तला खस् नेपाली भाय्या संकिपा ख्यलय् लोकंह्वाःपिं व नांजाःपिं नायिकातय् म्ह्याय्पिं जक मखसे संकिपा ख्यःया थीथी ख्यलय् लोकंह्वाःपिं कलाकारतय् म्ह्याय्पिं नं थ्व ख्यलय् दुहां वयाः थःगु कलाकारिता न्ह्यब्वया वयाच्वंगु दु ।

लिपांगु इलय् जक मखसे विगतय् नं थीथी कलाकारतय् म्ह्याय्पिं संकिपा ख्यलय् खने दयेकः वयेधुंकूगु दु । संकिपा ‘सीमा पारि’या कलाकार शम्भु प्रधानया म्ह्याय् इश्वरी प्रधानं नं ‘नेपाल प्यारो छ’ संकिपाय् नायिका जुयाः खने दयेकः वःगु खःसा वयां लिपा थ्व ख्यलं तापा वंगु खः । चरित्र अभिनेत्री मदुम्ह सुशीला रायमाझीया म्ह्याय् प्रशिद्धिका रायमाझीं ‘पिंजडा’ व ‘धनवान’ संकिपाय् नायिका जुयाः म्हितेधुंकाः थ्व ख्यलं तापाना वंगु दु ।

अथे हे सीमा पारीया मेम्ह नायिका उमा बेवी गिरीया म्ह्याय् शिवानी गिरीं ‘कहिँ कतै’ संकिपा व मेमेगु नं संकिपाय् अभिनय यायेधुंकूगु दु । संकिपा ख्यलय् कलाकारतय् कायम्ह्याय्पिं नं कलाकार हे जुयाः खने दयेकः वइगु सामान्य हे खः । गुलिखे कलाकारतय् मस्तय्सं थः मांअबुया पेशायात हे नालाः उकियात निरन्तरता बीत थ्व ख्यलय् पलाः न्ह्याकूगु खने दुसा गुलिखेसिनं धाःसा कलाकारिता ख्यःया थःगु रहर व शौख पूवंकेगु ल्याखं जक थ्व ख्यलय् दुहां वःगु नं खनेदु ।

उकिं थज्याःपिं कलाकारतय्सं थ्व ख्यलय् निरन्तरता बियाच्वंगु खने मदु । अथेला नेपाःया संकिपा ख्यलय् जक मखसे हलिउड व बलिउड नापं मेमेगु देय्या कलाकारया मस्तय्सं नं संकिपा ख्यलय् दुहां वयाः थःगु कलाकारिता क्यनेगु ज्या याना वयाच्वंगु मदुगु मखु । लिपांगु इलय् बउिडय् अप्वःथें कलाकारतय् मस्त संकिपा ख्यलय् खने दयेकः वयाच्वंगु दु धाःसां छुं पाइमखु ।

नेपाःया संकिपा ख्यलय् लोकंह्वाःपिं नायिकातय् म्ह्याय्पिं जक मखसे थीथी भूमिकाय् खने दयाच्वनीपिं कलाकारतय् म्हयाय्पिं नं थ्व ख्यलय् खने दयाच्वंगु दु ।
लिपांगु इलय् संकिपा ख्यःया कलाकारतय् मस्त मध्ये लोकंह्वानाच्वंम्ह व छम्ह व्यस्तम्ह नायिका खः केकी अधिकारी । रंगकर्मि बद्री अधिकारीया म्ह्याय् खः केकी । थुम्ह नायिकां संकिपाय् अभिनय यायेगु जक मखसे लिपांगु इलय् छगू संकिपा नं निर्माण यानाः थःत निर्माताया रुपय् प्रस्तुत यायेधुंकूगु दु ।

केकीं निर्माण याःगु संकिपा खः ‘कोहलपुर एक्सप्रेस’ । थ्व संकिपा प्रदर्शनय् वःगु इलय् हिन्दी संकिपा ‘मुम्बई एक्सप्रेस’या नक्कल धकाः यक्वसिनं धाःगु खः । केकीयात नेपाली संकिपा ख्यलय् ‘स्टार डटर्स’ अले स्थापित कलाकार धकाः नं धायेगु याः । विगतया आपालं नांजाःपिं कलाकारतय् मस्तय्सं संकिपाय् अभिनय याःसां अप्वःसिनं थ्व ख्यलय् निरन्तरता बिया वयाच्वंगु धाःसा मदु ।

थुपिंमध्ये आपालं थ्व ख्यलं तापाना वनाच्वंगु दु । नांजाःम्ह निर्देशक मदुम्ह शिव रेग्मीया म्ह्याय् भावना रेग्मीं ‘सो सिम्पल’ नांया संकिपाय् नायिका जुयाः खने दयेकः वःगु खः । अथे हे मेम्ह लोकंह्वाःम्ह हास्य कलाकार मदुम्ह गोपालराज मैनालीया म्ह्याय् सज्जा मैनालीं नं आपालं संकिपाय् नायिका जुयाः खने दयेकः वःगु खः । द्वन्द्व निर्देशक राजेन्द्र खड्गीया म्ह्याय् रागिनी खड्गीं नं संकिपाय् नायिका जुयाः म्हितूगु दुसा आपालं संकिपाय् नायिका जुयाः म्हितूम्ह अरुणिमा लम्साल कलाकार राधा लम्सालया म्ह्याय् खः ।

तर थौंकन्हय् थुपिं सकलें कलाकार संकिपा ख्यलं तापाना वने धुंकूगु दु । खस् नेपाली भाय्या संकिपाय् जक मखसे नेपालभाषाया संकिपा ख्यलय् नं कलाकारतय् म्ह्याय्पिं कलाकार हे जुयाः खने दयेकः वयाच्वंगु दु । न्हापांगु नेवाः संकिपा ‘सिलु’या नायिकानापं खय् भाय्या ‘माया पिरती’ ‘शान्तिदीप’ आदि संकिपाय् खने दयेकः वःम्ह नविना श्रेष्ठ जनगायक भृगुराम श्रेष्ठया म्ह्याय् खः ।

अथे हे नेपालभाषा संकिपा ख्यःया लोकंह्वाःम्ह छम्ह नायिका भिंतुना जोशी कलाकार नगिना जोशीया म्ह्याय् खः । ‘यांमिखा’ संकिपाय् नायिका जुयाः थ्व ख्यलय् पलाः न्ह्याकूम्ह भिंतुनां आपालं नेपालभाषाया संकिपा नापं खय् भाय्या ‘मेघा’ व ‘भ्रम’ नांया संकिपाय् नं अभिनय याये धुंकूगु दु । अथे हे नेवाः संकिपाया कलाकार नापं नांजाःम्ह म्येँ हालामि सरस्वति मानन्धरया म्ह्याय् बिनु मानन्धरं नं थीथी संकिपाय् नायिका जुयाः अभिनय यायेधुंकूगु दु ।

तर बिनु मानन्धर थौंकन्हय् थ्व ख्यलं तापानाच्वंगु दु । नेपालभाषाया मेगु संकिपा ‘थ्व ला ग्यानापु स्टाइल’य् मचा कलाकार जुयाः अभिनय यानाा तसकं चर्चाय् वःम्ह नस्वाः जोशी नेपालभाषाया टेलिप्याखंया कलाकार रुमन जोशीया म्ह्याय् खः ।

सम्बन्धित बुखँ

LEAVE YOUR COMMENTS