सोनमया इहिपा, भाःतम्ह ट्रोलया शिकार

एजेन्सी- बलिउड अभिनेन्त्री सोनम कपूरया इहिपा जूगु दु । सोनमं दिल्लीया व्यापारि आनन्द आहुजा लिसे मंगलवाः मुम्बइलय् शिख परम्परा कथं ब्याहा याःगु खः । सोनम हिन्दी फिल्मया नांजाःम्ह कलाकार अनिल कपूरया म्ह्याय् खः ।

सोनमया इहिपा संस्कार व भ्वजय् बलिउडया फुक्क धयाथें फिल्मस्टारतय्सं ब्वति काःगु खः । सोनम व आनन्द ताःई न्ह्यव निसें मतिनाय् तक्यनाच्वंपिं खः । इहिपाया संस्कार लिपा सोनम व आनन्द मुम्बइलय् जूगु रिसेप्सनय् केक तानाः थःपिनि तिपू जीवनया सुरुवात याःगु खः ।

सोनमया भाःत जूम्ह आनन्द दिल्लीया नांजाःम्ह व्यवसायी खः । आनन्द शाही एक्स्पोर्ट कम्पनीया प्रबन्धक निर्देशक खः ।

मेखे इहिपाया रिसेप्सनय् न्ह्यानातःगु लाकांया कारणं सोनमया भाःत आनन्द धाःसा सामाजिक सञ्जालय् ट्रोलया शिकार जुइमाल । सोनम ला न्ह्याबलें थें आकषर्क डिजाइनया वसतय् रिसेप्सनय् नं आकर्षक हे खनेदत । आनन्द नं डिजाइन यानातःगु शेरवानी फिनाः आकर्षक हे खने दयाच्वंगु खः, तर वं शेरवानी फिनाः लाकाः धाःसा तुयुगु ‘स्पोर्टस सुज’ न्ह्यानातल । थःगु हे ब्याहा भ्वजय् शेरवानी लिसे मल्वयेक स्पोर्ट सुज न्ह्यानातःगुलिं आनन्द बांमलाक ट्रोलया शिकार जूगु खः ।