ब्रुमर न्हिं न्यागू रुटय्
येँ महानगरपालिकां वंगु मंगलवाःनिसें ब्रुमर (यान्त्रिक तुफि)या प्रयोग यानाः सतक सफा यायेगु शुरु याःगु दु । येँ मनपां छगू ज्याझ्वःया दथुइ औपचारिक रुपं ब्रुमर संचालन यासें वंगु फागुन २८ गते इटालीं हःगु न्यागः ब्रुमर प्रयोगय् हःगु खः । ज्याझ्वलय् येँ मनपाया प्रमुख विद्यासुन्दर शाक्यं न्हियान्हिथं बहनिसिया च्याताः इलंनिसें सुथसिया प्यताः ईतक सतक सफा यायेगु ज्या जुइगु जानकारी बियादिल ।
वय्कःयाकथं उगु यन्त्र न्हिथं च्याघौतक प्रयोग जुइ । येँ मनपाया उपप्रमुख हरिप्रभा खड्गी श्रेष्ठं थ्व यन्त्रयात प्रभावकारी रुपय् संचालन यायेगु निंतिं सडक विभागया मातहतय् दुगु सतकय् च्वंगु गाः ल्हाकेमाःगु आवश्यक जूगु जानकारी बियादिल । येँ मनपाया प्रमुख प्रशासकीय अधिकृत यादवप्रसाद कोइरालाया कथं येँयात धूमुक्त दयेकेत न्यागः ब्रुमरं मगाः धासें झिंन्यागः ब्रुमर आवश्यक जूगु धयादिल ।
कानून रुपय् ८ मिटर स्वयां म्हो ब्या दुगु सतक जक येँ मनपाया जिम्मेवारीइ लाः । उगु ब्रुमर १० करोड ८० गू लाख लागतय् हःगु खः । थ्व स्वयां न्ह्यः विशिष्ट व्यक्तिपिं वये वने याइगु इलय् सडक विभाग व महानगरपालिकां थवंथवय् समन्वय यासें विभागयाके दुगु निगः ब्रुमरं सतक सफा यायेगु याना वयाच्वंगु खः । येँ मनपालिसे थ्व स्वयां न्ह्यः दुगु छगः ब्रुमर नं प्रयोग याये मिले मजूगु अवस्थाय् दुगु येँ मनपां न्ह्यथंगु दु ।
वंगु असारय् याःगु बोलपत्रया लिधंसाय् उगु यन्त्र हःगु खः । न्यागः ब्रुमरमध्ये प्यंगः १६ टन क्षमता बराबरया व मेगु छगू ६ टन क्षमताया दु । उगु ब्रुमरय् न्हिं १० किलोमिटरतक धू संकलन याये फइगु क्षमता दु । युरो मापदण्डया धयातःगु उगु ब्रुमरया न्ह्यःने, दथुइ व लिउनेया भागय् जवंखवं यानाः प्लाष्टिकया प्यंगू ब्रुससहित धू साले फुगु शक्तिशाली क्षमताया पाइप जडान यानातःगु दु ।
लिपांगु इलय् निर्माणया ज्या तीव्र रुपय् अप्वयाः धू अप्वया वनाच्वंगु अवस्थाय् उगु ब्रुमरं सतकया धू सफा यायेत तःधंगु ग्वाहालि जू वनीगु विश्वास येँ मनपां याःगु दु ।
उगु ब्रुमर संचालनया निंतिं हाल न्यागू सतक क्षेत्र क्वःछिनातःगु दु, गुकी टेकुं शुरु जुयाः सोल्टीमोड जुयाः कलंकी, त्रिपुरेश्वर, लुँहिति, न्हूसतक, जुद्ध शालिक, मांकाःद्यः, जमः, लाजिम्पाट, शितल निवास, शिक्षण अस्पताल, नारायणगोपाल चोक तक दु ।
अथे हे टेकुं शुरु जुयाः त्रिपुरेश्वर, थापाथली, माइतीघर, बबरमहल, बानेश्वर, तीनकुने जुयाः अन्तर्राष्ट्रिय विमानस्थलतक व अनं लिहां वयाः तीनकुनें कोटेश्वर, पेप्सिकोलातक निगूगु क्षेत्रया सतक क्वःछिनातःगु दु ।
टेकुं लुँहिति जुयाः भोताहिति, विश्वज्योति, घन्टाघर, लुँमधि, सिंहदरवार, पुतलीसतक, कमलादि मोड, हात्तिसार, जय नेपाल सिनेमा हल, दरवार मार्ग, कमलादी प्रज्ञा भवन लिउनेपाखें काठमाडौ मलतक दु । दरवार मार्गय्च्वंगु महेन्द्रया शालिकं नारायणहिति जुयाः केशरमहल चोक, अनं लाजिम्पाटपाखे खानी तथा भूगर्भ विभाग न्ह्यःनेया चोक, नारायणहिति उत्तर ध्वाखा, गै¥हीधारा, प्रधानमन्त्री निवास, रसियन दूतावार जुयाः शीतल निवास, पानीपोखरी लैनचौर सो¥हखुट्टे तक सतक सफा याइ ।
ऋथे हे कमलपुखू, ज्ञानेश्वर, मय्ति, पुलांगु बानेश्वर, सिनामंगल, एअरपोर्ट गेट, गौशाला, चाबही, होटल हायात, चुच्चेपाटी, बत्तीसपुतली, प्रदर्शनी मार्ग दु ।
न्यागूगु क्षेत्र अन्तर्गत न्हूसतकय् च्वंगु तिंख्यःध्वाखा, बसन्तपू, वंघः, केशरमहलं त्रिदेवीमार्ग, रत्नराज्य स्कुल थापागाउँ, अन्तर्राष्ट्रिय सम्मेलन केन्द्र, सीतापाइला, ल्हुति, ग्वंगःबुँ, नारायण गोपाल चोक, चाबहीया सतक सफा याइ ।
LEAVE YOUR COMMENTS