नवदुर्गां जलसमाधि काइगु दिं
ख्वप (नेपालभाषा टाइम्स) – थौं भलभल अष्टमि । थ्व न्हियात भवस्ती नं धायेगु याः । नवदुर्गां दँय्दसं थ्व न्हिकुन्हु जलसमाधि काइ । ख्वपय् थुकियात चलन चल्तीया भासं नवदुर्गा सीगु (मृत्यु जूगु) दिं कथं नालातःगु दु । तर थ्व नवदुर्गा सछिन्हुया लागिं जलय् बिज्याइगु तान्त्रिक प्रक्रिया खः ।
नवदुर्गां दँय्दसं ब्रम्हायणी कुण्डं श्रृष्टि जुयाः ब्रम्हायणी कुण्डय् हे जलसमाधि काइगु खः । उकिया लागिं आँचा बःजुपाखें तान्त्रिक रुपं कलसय् च्वंम्ह द्यःया हंस वा प्राण कथं नालातःगु न्यास (न्याः) यात उगु कलसं लिकया ब्रम्हायणी कुण्डय् त्वती । अले सछिन्हु तक उगु न्यास जलय् च्वनाबिज्याइ । मोहनिया नवमिकुन्हु हाकनं कलसय् न्यासयात प्रतिस्थापन यायेवं नवदुर्गा जीवित देवी कथं गुलात्या तक बिराजमान जुइ ।
नवदुर्गा जलसमाधि जुइगु दिं थौं नवदुर्गाया फुक्कं ख्वाःपा नवदुर्गा द्यःया द्यःछेँया दथुइ च्वंगु चुकय् थीथी थासं हयातःगु स्वां सिमा लिसें यखाया तइ । उकियात तान्त्रिक विधिपाखें पूजा यानाः थाकुलिनकिंपाखें अभिषेक पूजा जुइ । थाकुलिनकिंया आदेश कथं छम्ह छम्ह यानाः सनिलपाखे थीथी कथंया विरह प्याखं हुलाः म्ह दुछिं दुछिं तचुवा वनाः ग्वाहालिमिपिंसं थनेवं पिने वनेगु स्वइ ।
छम्ह छम्ह यायां पिने वने धुंकाः फुक्कं देवगणत ख्वप देय् चाःहिला पूजा फइ । थ्व लिपांगु पूजा खः । देय् चाःहिले धुंकाः पूजा फयाः हाकनं नवदुर्गाया द्यःछेँय् हे दुहां वयेत तिंतिं न्हुया वःम्ह छम्ह छम्ह द्यःयात खापा तिना छपिं तलेजुया सिजा नःपिं जुल आः थःगु हे थासय् हुँ धकाः ब्रम्हायणी कुण्डय् वनेत अह्रे याइ । खापा मचालेवं बिरहया प्याखं हुहुं न्हापां सूर्यमढी त्वालय् थ्यंकी । अबलय् तक चान्हसिया बाचा जाइ । उगु थासय् गयाः ल्वहँतय् फै स्यानाः पूजा यानाः तुइगु कापतं सिम्हेसित थें नवदुर्गाया झिंस्वपातं ख्वाःपालय् त्वपुइका झ्वःलिक सिथं यंकी ।
थुकथं ख्वाःपाःयात सिम्हेसित थें तुइगु कापतं त्वपुया यंकूगु सुनानं स्वये मत्य धाइगु चलन दु । स्वल धाःसा दशा मभिनि धाइ । ख्वाःपाः फुक्कं सिबाजं थानाः सिथं यंकाः ब्रम्हायणी पीठय् थ्यंकी । तान्त्रिक विधिं मू आचाजुं कलशं न्यास लिकया ब्रम्हायणी कुण्डय् नवदुर्गा जलसमाधि याके धुंकाः ब्रम्हायणी जगतिइ तयार यानातःगु ग्वसिँइ ख्वाःपाः द्यःने तयाः मटु लिकयातःगु ख्वाःपाः सीम्ह उइ थें उनाथकी । नवदुर्गा जलसमाधि काइगु दिं थौं हे पशुपतिइ ग्वलय् मचातिया जात्रा नं जुइ ।
LEAVE YOUR COMMENTS