मानवअधिकार आयोगया प्रतिवेदन जेनेभाय् छ्वल
येँ (नेपालभाषा टाइम्स) – राष्ट्रिय मानवअधिकार आयोगं भदौ २३ व २४ गतेया जेनजी आन्दोलनया घटनाया अध्ययन प्रतिवेदन जेनेभास्थित राष्ट्रसंघयि मानवअधिकार उच्चायोगया ज्याकुथी छ्वःगु दु । जेनजी आन्दोलनया प्रतिवेदन नेपालय् सार्वजनिक यायेत माग जुयाच्वंगु इलय् अंग्रेजीं भाय् हिलाः जेनेभाय् छ्वःगु खः । सरकारं प्रतिवेदन कार्यान्वयन याइगु खँय् शंका जूगुलिं सरकारयात दबाब बीत प्रतिवेदन जेनेभाय् छ्वःगु अनुमान याःगु दु ।
आयोगं जेनजी आन्दोलनय् दमन व विध्वंसया बारे जाँचबुझ यानाः सरकारयात कारबाहीया सिफारिस याःगु खः । तर सरकारं प्रतिवेदन सरकारयात वःगु हे मदुनि धासें कारबाही प्रक्रिया न्ह्याकेगु ज्या मयायेवं सरकारयात दबाब बीकथं प्रतिवेदन जेनेभाय् छ्वःगु खँ धाःगु दु । आयोगं प्रतिवेदनया छुं ब्व जक सार्वजनिक यायेवं आयोगया ज्यायात कयाः नं आलोचना जूगु खः ।
आयोगया छम्ह पदाधिकारीयाकथं प्रतिवेदन नेपालय् सार्वजनिक यायेत इनाप यानागु खःसां नं सार्वजनिक मजूगुलिं आः जेनेभाय् प्रतिवेदन सार्वजनिक जुइफइगु खँ धयादीगु दु । आयोगं सार्वजनिक याःगु प्रतिवेदनय् तत्कालीन प्रधानमन्त्री केपी शर्मा ओली, गृहमन्त्री रमेश लेखक, आईजीपी चन्द्रकुवेर खापुङयात फौजदारी कसुरय् अनुसन्धान न्ह्याकेत सिफारिस यानातःगु दु । उकथं हे पत्रकार, सोसल मिडिया इन्फुलेन्सर, कलाकारतय्त नं कारबाहीया सिफारिस यानातःगु दुसा वर्तमान संसदय् सांसद जुयाच्वंपिनिगु बारे नं अनुसन्धान यायेत सिफारिस यानातःगु दु ।
आयोगं सरकारयात कारबाहीया सिफारिस यायेगु झ्वलय् निलाया दुने प्रतिवेदन कार्यान्वयन जू मजूया बारे प्रतिवेदन बीत नं सरकारयात निर्देशन बिउगु खः । तर सरकारं आः तक नं प्रतिवेदन हे थःथाय् मथ्यंनि धयाच्वंगु दु ।
जेनजी आन्दोलनया प्रतिवेदनयात कयाः विदेशी सञ्चार माध्यमतय्सं नं आयोग वयाः न्यनेकने यानाच्वंगु खँ सीदुगु दु । जेनजी आन्दोलन लिपा अन्तर्राष्ट्रिय चिउताः अप्वया वनाच्वंगुलिं नं आयोगं प्रतिवेदन जेनेभाय् छ्वःगु खँ छम्ह पदाधिकारीं जानकारी बिउगु दु । वय्कःया कथं थ्व स्वयां न्हापा थुकथं अन्तर्राष्ट्रिय प्रतिनिधितय्सं चिउताः क्यनेगु मयाः । जेनजी आन्दोलनयात कयाः धाःसा अन्तर्राििष्ट्रय सञ्चार माध्यमया लिसे मेमेगु मानवअधिकारवादी संघसंस्थां नं चिउताः क्यनाच्वंगु दु ।
LEAVE YOUR COMMENTS