ल्यान्डफिल साइटय् वित्तीय साझेदारी याइगु

येँ (रासस) – येँ महानगरपालिकां फोहोर व्यवस्थापनस्थल बञ्चरेडाँडा ल्यान्डफिल साइटया आयु अप्वयेकाः दिगोपन बीत मेमेगु स्थानीय तहलिसे ‘वित्तीय साझेदारी’ याइगु जूगु दु । येँ मनपा कार्यवाहक प्रमुख सुनिता डंगोलं फोहोर व्यवस्थापनय् सहजता हयेत स्रोतय् हे वर्गीकरण यानाः मात्रा म्हो यायेगु विधि व प्रक्रियायात कार्यान्वयन यानायंकूगु जानकारी बियादिल ।

कार्यवाहक प्रमुख डंगोलं धयादिल, ‘ल्यान्डफिल साइट व उगु लागालिसे सम्बन्धित पूर्वाधार व सामाजिक क्षेत्रया ज्याझ्वःया निंतिं येँमनपां वार्षिक थ्यंमथ्यं १ अर्ब खर्च यानाच्वंगु दु । लिपांगु इलय् महानगरपालिकां थीथी थासय् उत्पादन जूगु फोहरयात स्रोतय् हे वर्गीकरण यानाः म्हो जक फोहोर ल्यान्डफिल साइट थ्यंकेगु ज्यायात प्राथमिकता बियागु दु । फोहोरया भारया आधारय् स्वनिगःया स्थानीय तहं वित्तीय साझेदारीया अपेक्षा यानाच्वंगु खँ कनादिसें महानगरपालिकां थुकिं स्थानीय तहयात थःम्हं उत्पादन याःगु फोहोर व्यवस्थापनय् अपनत्वबोध याकेगु कथं ध्वाथुइकादीगु खः ।

महानगरपालिकां फोहोरया भारया आधारय् वित्तीय साझेदारीया अवधारणा न्ह्यःने हःगु खः । येँ महानगरपालिका लागाय् तुलनात्मक रूपं यक्व फोहोर उत्पादन जुइगु जूगुलिं थ्यंमथ्यं ५० प्रतिशत वितीय जिम्मेवारीया ब्व कायेत थःपिं तयार दूगु कार्यवाहक प्रमुखं धयादीगु दु ।

साइटया आयु अप्वयेकेत फोहोर वर्गीकरण, पुनःप्रयोग, पुनःचक्रीय प्रयोग विधिया प्रवद्र्धनया विषयय्् खँल्हाबल्हा जूगु खः । थौंकन्हय् स्वनिगः, काभ्रेपलाञ्चोक, नुवाकोट व धादिङया स्थानीय तहय् पिहांवःगु फोहोर व्यवस्थापन बञ्चरेडाँडाय् जुयाच्वंगु दु ।