यचुगु नुगः म्यूजिक भिडिओ पिदन
यल (नेपालभाषा टाइम्स) – पवन जोशीया १२९ औं निर्देशनय् नेपालभाषा म्युजिक भिडियो ‘यचुगु नुगः’ वंगु शुक्रवाः सानेपाया न्यू मसला दरवारय् मूपाहाँ म्ये हालामि नाप समाजसेवी सरिता महर्जनं झःझः धायेक पितब्वज्या जुल ।
म्ये हालामि नानी शोभा महर्जनया अध्यक्षताय् नेपालभाषा ख्यलय् थीथी कथं म्हसिका दुम्ह ललेन्द्र शाक्यं न्ह्याकूगु ज्याझ्वलय् म्ये हालामि राजेश शाक्यं लसकुस न्वचू तयादीगु खः ।
संकिपा धैगु खंग्व, लय् व सःयातः कःघाना म्येंया भाव कथं ब्वयेगु कुतः धिसिलाःगु म्यें संकिपा खः । सँकिपाः धैगु स्वैपिसं ध्वाथुइगु कथं ब्वयेमाः गुकिंयाना भाय् मथूसां पूवंक प्याखँ स्वलकी बाखँ ध्वाथुइगु कथं जुइमाःगु खँ निर्देशक जोशी कनादिल । नेपालभाषा सँकिपाः विकास यायेया नितिं सकल नेवाःत छधी छप्पं जुयाः कलाकःमिपिंत हःपाः व तिवः बीतनं इनाप याःगु दु ।
यचुगु नुगः म्यें च्वमि व निर्देशन पवन जोशी, लय् बाजंग्वसा सुमन कपाली, मिसा सः नानी शोभा महर्जन व मिजं सः राजेश श्रेष्ठयागु दुसा हिसि स्टुडियोसं रेकर्ड, मिक्सीङ व माष्टरिङ जूगु म्यें संकिपाया मोडल भाजु आर्शु महर्जन व मय्जु नशला महर्जन, समाः व नृत्य मिरा डंगोल, ल्यू निर्देशक सुरेन्द्र श्रेष्ठ, क्यामरा सम्पादन व रंगसमिश्रण राजेश शाक्य, निर्मात्री नानी शोभा महर्जन खः ।
मूपाहां सरिता महर्जन नापं थीथी व्यक्तित्वपिं गथेकि के.बि.एस. लुभु, सुन्दर मान श्रेष्ठ, आर्शु महर्जन, नहला महर्जन, भिन्तुना जोशी, सरश्वती मानन्धर, श्याम कृष्ण श्रेष्ठलगायतपिसं भितुना न्वचः तयेगु झ्वलय् थुगु यचुगु नुगःलय् म्ये सँकिपाः यक्वः हे नेवाः पहः, मौलिकतां जाःगुलिं थ्व स्वयेधुंकाः थःपिं मचाबलय्या पहः लुमंका दीगु दु ।
थुगु म्ये संकिपाय् प्रत्यक्ष व अप्रत्यक्ष, पर्दा न्ह्यःने व ल्यूने च्वना ग्वाहालि यानादीपिंत मूपाहाँ महर्जनं लुमन्ति चिं लःल्हानादीगु खः ।
अथेहे म्येहालामि नानी शोभा महर्जनयात थौं स्वयां स्वीगुदँ न्ह्यः निर्माण याःगु नेपालभाषा संकिपाया निर्मात्री रञ्जना जोशीं भिंतुना पौ, व पूच्वः मां पुचः व ल्यासे पुचलं स्वाँम्हू बिया सुवाःनं ब्यूगु दु ।
LEAVE YOUR COMMENTS