फलफुल मवयेवं कुलेश्वरया बजाः बन्द जुइगु अवस्थाय्

येँ – येँया कुलेश्वरय् च्वंगु फलफूल बजाः छन्हु निन्हुया दुने बन्द जुइगु अवस्थाय् थ्यंगु दु । कोरोना भाइरसया संक्रमणया कारणं सरकारं देय्न्यंकं ‘लकडाउन’ घोषणा यायेवं भारत व चीनं नेपालय् फलफूल आयात मजुइवं बजाः बन्द जुइगु अवस्थाय् थ्यंगु खँ व्यापारीतय्सं धाःगु दु ।

लकडाउन लिपा न्हापा कोल्ड स्टोरय् तयातःगु फलफूल मीगु ज्या जुयाच्वंगु धासें अनया ब्यापारीतय्सं आः दुगु स्टक मदयेवं बजाः पूर्ण रुपं बन्द जुइगु खँ धाःगु खः । लकडाउन लिपा कोल्ड स्टोरय् दुगु आपालं फलफूल स्यनाः वंगुलिं नं बजारय् फलफूलया अभाव जुयाः पसः बन्द यायेमाःगु अवस्था ब्वलंगु खः ।

लकडाउन जुइधुंकाः खुद्रा व्यापारीत बल्खुया बजाः थ्यंकः वयेमफयेवं आपालं फलफूल नष्ट जूगु खँ धासें छम्ह ब्यापारीं धाःगु दु, ‘जिमिके नं छुं भचा केरा दुगु खः, खुद्रा व्यापारीत मवयेवं दुगु केरा नं धमाधम स्यना वन, छुं छुं केरा सुरक्षाकर्मीतय्त इना बिया ।’

थौंकन्हय् कुलेश्वरया फलफूल बजारय् छं भचा मेवा, केरा, खरबुजा जक ल्यं दनिगु व स्याउ धाःसा बजारय् ताःई न्ह्यवंनिसें मदुगु जानकारी नं उम्ह व्यापारी बियादीगु दु । अथे हे सन्त्रासी नं बजारय् म्हो जुया वनाच्वंगु दु ।

नेपालय् स्याउया आपूर्ति चीनं जुयाच्वंगु खःसा कोरोना भाइरसया कारणं पूवंक हे स्याउ आयात बन्द जूगुलिं बजारय् स्याउया अभाव जूगु खः । चीनय् कोरोना भाइरसया संक्रमण अप्वया वनेवं नेपाः व चीन दथुइ सीमा बन्द यायेवं चीनं स्याउ आयात बन्द जूगु खः ।

मेखे व्यापारीतय् कथं चीनं नेपाः नाका बन्द याये स्वयां न्ह्यः केरुङ जुयाः नेपाः दुहां वइगु गाडी केरुङय् तुं थानाच्वंगु दुसा अज्याःगु गाडीइ तयाहःगु स्याउ पूर्ण रुपं ध्वगिइ धुंकुगु खँ नं धाःगु दु । व्यापारीतय् कथं चीनय् कोरोनाया संक्रमण जुइवं आपालं व्यापारीत घाटाय् वनेधुंकूगु दु ।

अथेहें भारतं सामान ज्वना वइपिं ट्रक चालकतय् नयेत च्वनेत समस्या जुइगुलिं यानाः ट्रक चालकत वयेत तयार मजुयाच्वंगुलिं नं भारतं फलफुल आयात जुइमफयाच्वंगु दु । लँय् दथुइ हे गाडी स्यन धाःसा दयेकेगु निंतिं कारखाना तकं मचाइगुलिं यानाः नं ट्रक चालक वये चाहे जुयाच्वंगु मदु ।