नेपाः–मलेसिया दथुइ श्रम समझदारीइ हस्ताक्षर, मलेसियाय् याकनं ज्यामि छ्वइगु
येँ – नेपाली ज्यामितय्त थप भार मजुइकथं नेपाः व मलेसिया दथुइ श्रम समझदारी जूगु दु । श्रम, रोजगार तथा सामाजिक सुरक्षा मन्त्री गोकर्ण विष्ट व मलेसियाया मानव संशाधन मन्त्री एम कुलासेगरान दथुइ जूगु मन्त्रिस्तरीय वार्ता लिपा समझदारी पत्रय् हस्ताक्षर जूगु खः । समझदारी पत्रय् ज्यामि भर्ना, रोजगारी व लिहां वयेगु सम्बन्धी थीथी बुँदा न्ह्यथनातःगु दु ।
समझदारी कथं मलेसियाय् ज्यामित छ्वयेबलय् सेवा शुल्क, वये–वनेगु हवाइ टिकट, भिसा शुक्ल, स्वास्थ्य परीक्षण, सुरक्षा जाँच थेंज्याःगु खर्च रोजगारदाता कम्पनीं हे ब्यहोरे यायेमाःगु जुइ । अथेहे मलेसियाय् ज्या यानाच्वंगु इलय् ज्यामिया सतिकं लाःम्ह सुं थःथिति (मां, अबु, भाःत, कलाः, काय् वा म्ह्याय्) मन्त धाःसा झिंन्यान्हु तक बिदा कयाः स्वदेश लिहां वयेदइ ।
अथेहे ज्या यानाच्वनागु थासय्या ज्यामि दुर्घटना बीमा व स्वास्थ्य बीमायात मलेसियाया कानुन कथं ज्यामितय्त व्यवस्था यानातःगु व्यवस्था नेपाःमि ज्यामितय्त नं लागु जुइ । भविष्यय् सरकारं न्हूगु बीमा योजना लागु याःसां थ्व नं नेपाःमि ज्यामितय् हकय् नं लागू जुइ । अथेहे ज्याया झ्वलय् ज्यामि सित धाःसा व अंगभंग जुल धाःसा रोजगारदाता कम्पनीं नेपाली दूतावासय् खबर यायेमाः ।
समझदारीपत्रय् मिसापिं ज्यामितय् हकय् विशेष ध्यान बियाः थप सुरक्षा, संरक्षण व रेखदेख यायेमाःगु व्यवस्था नं यानातःगु दु ।
अथेहे ज्यामिया मृत्यु जुल धाःसा सीम्ह नेपाः छ्वयेगु जिम्मेवारी सम्बन्धित रोजगारदाता कम्पनीया हे जुइ ।अथेहे नेपाःमि ज्यामितय्त मलेसियाया श्रम कानुन कथं समान तहय् ज्या याइपिं विदेशी ज्यामितय्त बियाच्वंगु संरक्षण मलेसियाया सरकारं प्रदान याइगु जुइ । अथेहे निगुलिं देड्ढया सरकारं थःथःगु देशय् ज्यामि, रोजगारदाता व श्रमिक आपूर्तिकर्ताया ज्या अनुगमन व नियमन यानाः थप व्यवस्थित यायेमाःगु व्यवस्था यानातःगु दु ।
न्हूगु समझदारीकथं ज्यामितय् करार अवधि नं निदँ जक क्वःछिगु दु । थ्व स्वयां न्ह्यः करार अवधि स्वदँ यानातःगु दु । अथेहे ज्यामितय् पारिश्रमिक नं महिनाया ७ तारिख दुने बैंक खाताय् भुक्तानी यायेमाःगु व्यवस्था याःगु दु । मलेसियाया सरकारं तोके यानातःगु न्यूनतम पारिश्रमिक स्वयां म्हो मजुइकथं तलब, भत्ता व सुविधा दइगु सुनिश्चित जुइमाःसा थप ज्या याःगु बापत थप पारिश्रमिक व सेवा सुविधा बीमाःगु व्यवस्था यानातःगु दु ।
अथेहे समझदारीपत्रय् ज्यामिया निंतिं उचित वातावरण व वासस्थान लिसें व्यवसायजन्य स्वास्थ्य तथा सुरक्षया नं प्रबन्ध यायेमाःगु खँ न्ह्यथनातःगु दु । अथेह समझदारीपत्रय् मिसापिं ज्यामितय् हकय् विशेष ध्यान बियाः थप सुरक्षा, संरक्षण व रेखदेख यायेमाःगु व्यवस्था नं यानातःगु दु ।
समझदारीपत्रय् हस्ताक्षर जुइधुंकाः छुं ई न्ह्यवनिसें मलेसियाय् नेपाःमि ज्यामित वनेगु पनातःगुयात आः चायेकीगु जूगु दु । मलेसियाय् ज्यामि छ्वयेगु निंतिं थीथी एजेन्सीतय्सं थीथी शीर्षकय् ज्यामितय्त ध्यबा कायेगु यानाच्वंगुलिं सरकारं थज्याःगु एजेन्सीत खारेज यानाबिइवं खुला न्ह्यवनिसें मलेसियाय् ज्यामित छ्वयेगु बन्द जुयाच्वंगु खः ।
LEAVE YOUR COMMENTS