‘विदेशी विज्ञ आवश्यक मजू’

निर्मल पन्त प्रकरणय् प्रमया धापू प्रति नेपाःया विज्ञत असहमत

येँ – कन्चनपुरया मिसा मचा निर्मला पन्तया बलात्कार लिपा हत्या जूगु घटनाय् अनुसन्धानया निंतिं माल धाःसा अन्तर्राष्ट्रिय अनुसन्धानकर्तात तकं सःतेगु जुइ धकाः प्रधानमन्त्री केपी ओलीं धयादीसां नं नेपाःया आन्तरिक सुरक्षा मामिला सम्बन्धी विज्ञतय्सं धाःसा अथे याये मजिउगु सुझाव बिउगु दु ।

अन्तर्राष्ट्रिय अनुसन्धानकर्ता सःतल धाःसा नेपाल प्रहरीया क्षमताय् न्ह्यसः चिं ब्वलनी धासें सुरक्षा निकायया पुलांपिं अधिकारीतय्सं अज्याःगु सुझाव बिउगु खः । घटना जूगु न्याला दयेधुंकाः नं दोषी म्हसीके मफयेवं प्रधानमन्त्री केपी ओलीं वंगु आइतवाः घटनाया अनुसन्धानया निंतिं विदेशी अनुसन्धानकर्ता सःताः जूसां अनुसन्धान याकाः हत्यारा मालेगु जुइ धकाः न्ववानादीगु खः ।

तर प्रधानमन्त्रीया उगु अभिव्यक्तियात पुलांपिं प्रहरी अधिकारीतय्सं धाःसा असहमति क्यंगु दु । वय्कःपिंसं अनुसन्धानया छगू पक्षय् अन्तर्राष्ट्रिय प्राविधिकया ग्वाहालि कायेगु तक पाय्छि जूसां समग्र अनुसन्धानया जिम्मेवारी अन्तर्राष्ट्रिय प्रहरीयात बीगु उचित मजुइगु सल्लाह बिउगु खः ।

बलात्कार लिपा जूगु हत्या काण्डयात कयाः स्वंगू छानबिन कमिटी गठन यायेधुंकाः नं निर्मलाया हत्यारा म्हसीके मफयेवं प्रधानमन्त्रीं अथे धयादीगु खः । पन्त प्रकरणय् अनुसन्धान यानाच्वंपिं प्रहरी हे कारबाहीलय् लायेधुंकाः मेपिं प्रहरी अधिकारीया मनोबल कुहां वंगुलिं अनुसन्धानया निंतिं अन्तर्राष्ट्रिय अनुसन्धानकर्ता सःतेगु बांलाःगु निर्णय मजुइगु खँ नं पुलांपिं प्रहरी अधिकारीतय्सं धाःगु दु ।
अपराध अनुसन्धान महाशाखाय् ताः ई ज्या यानादीधुंकूम्ह पुलांम्ह प्रहरी नायव महानिरीक्षक हेमन्त मल्लं अनुसन्धानया छुं ब्वय् ग्वाहालि कायेगु बांलाइगु खँ कँसे समग्र रुपं अनुसन्धानया जिम्मेवारी धाःसा बी मजिउगु खँ धयादीगु दु ।

वय्कलं धयादी, ‘थनया भूगोल, जनजीवन, थनया मनूतय् व्यवहारया खँ ल्हाये । व ला जिपिं प्रहरीं हे थुइके फइ । बरु नेतृत्व नेपाल प्रहरीयात हे बियाः छुं विषय गथेकि बलात्कार विज्ञयात सःतल धाःसा अनुसन्धानय् ग्वाहालि जुइ ।’ प्रहरी अधिकारीतय् कथं लगातार आन्दोलनं सरकारयात दबाब लाःगु जुइफु अले प्रहरीया क्षमताय् नं गुलिखे न्ह्यसः चिं दयेफु तर समग्र अनुसन्धानया जिम्मेवारी अन्तर्राष्ट्रिय प्रहरीयात बीगु धाःसा उचित जुइ मखु । मेखे गृह मन्त्रालयया पुलांम्ह सचिव खेमराज रेग्मी नं नेपाल प्रहरीं थाकुगु स्वयां थाकुगु अपराध अनुसन्धानय् सफलता चूलाकूगु यक्व दसु दु धासें संयम जुइत सुझाव बियादीगु दु ।