
येँ(नेपालभाषा टाइम्स)- सीघःस्थित धर्मकीर्ति विहारया प्रमुख श्रद्धेय अनागारिका धम्मावति गुरुमांया प्रतिमूर्ति दयेकाः पिथनीगु जूगु दु । वसपोल प्रमुख जुयाच्वनाबिज्याःगु धर्मकीर्ति विहारं वसपोलया धम्मावति गुरुमांया प्रतिमूर्ति दयेकाः पिथनेत्यंगु खः ।
वंगु दिल्लाथ्व पुन्हि (गुरुपुन्हि)कुन्हु ९० दँय् क्यनाबिज्याःम्ह शासनधज धम्माचरिय अग्गमहागन्थवाचक पण्डित भाषा थुवाः श्रद्धेय अनागारिका धम्मावति गुरुमांया बुन्हिया लसताय् वसपोलाय प्रतिमूर्ति पिथनेत्यंगु खः ।
नेपाःया थेरवाद बुद्ध शासनिक ख्यलय् ज्वःमदुगु योगदान बियाबिज्याःम्ह वसपोलया ९० दँ बुन्हिया लसताय् वंगु छुं दिं न्ह्यः जक नागरिकस्तरं हनेज्या याःगु खः । अथे हे वसपोलया ९० दँ बुन्हिया हे लसताय् थेरवाद, महायान व वज्रयान भिक्षु लामा गुरुपिंपाखें धर्मकीर्ति विहारय् छवाःयंकं अभिधम्म पाठ याःगु खः ।
थ्व हे झ्वलय् वंगु सोमवाः सीघःस्थित श्रीघः ज्ञानमाला भजन खलकं नं वसपोलयात हनेज्या याःगु खः ।सीघःया चैत्य परिक्रमा याकाः हनापौ देछासे हनेज्या याःगु ज्याझ्वलय् भजन खलःपाखें ज्ञानमाला भजन नं न्ह्यब्वःगु खः । थुकथं हे छुं दिं न्ह्यः जक थीथी ब्वनेकुथिया ब्वँमिपिंत कापी कलम नं इनेज्या याःगु खः ।
LEAVE YOUR COMMENTS