सतक विस्तारया फैसला उल्टे याकेगु पुनरावेदन खारेज

येँ – पीडित जनतायात माक्व मुआब्जा बियाः जक सतक विस्तारया ज्या न्ह्यःने न्ह्याकि धकाः सर्वोच्च अदालतं याःगु फैसलायात उल्टे यायेमाः धकाः सरकारं तःगु निवेदनयात सर्वोच्चं खारेज याना बिउगु दु । उपत्यका विकास प्राधिकरणं सतक विस्तारया नामय् चांचां जनताया छेँय् डोजर चले यानाः थुना छ्वयेगु ज्या यायेवं उपत्यकाव्यापी सडक विस्तार पीडित संघर्ष समितिं सर्वोच्च अदालतय् उकिया विरुद्ध रिट तःगु खः ।

उकी सर्वोच्चं पीडितया पक्षय् फैसला बिसें पीडितयात मुआब्जा बियाः जक छेँ अधिकरण याये माःगु, पीडितया स्वीकृति कयाः जक वयागु छेँ काये दइगु निर्णय याना बिउगु खः । तर सरकारं सर्वोच्चं धाः थे मुआब्जा बियाः सतक विस्तार याये माल धाःसा ज्या याये फइ मखु धासें सर्वोच्चया उगु फैसला उल्टे याये माल धकाः पुनरावलोकन तःगु खः ।

उकिया बारे म्हिगः सर्वोच्चया न्याम्ह न्यायाधीशतय्गु मंकाः इजलाशं सुनुवाई यासें सरकारं तःगु उगु पुनरावलोकन खारेज यायेगु फैसला न्यंकूगु खः । सर्वोच्चया न्यायाधीशपिं मीरा खड्का, विश्वम्भर प्रकाश श्रेष्ठ, अनिल कुमार सिन्हा, सपना प्रधान मल्ल व टंकबहादुर मोक्तानया पूर्ण इजलाशं उगु फैसला न्यंकूगु खः ।

सर्वोच्चया उगु फैसलायात सतक विस्तार पीडित संघर्ष समितिं लसकुस याःगु दु । थ्व फैसलायात लसकुस यासें संघर्ष समितिं सोमवाः वाडेगामय् छगू लसता जुलुस नं पिकायेगु निर्णय याःगु दु । अथे हे थ्व फैसलायात लसकुस यासें चैत १५ गते येँय् स्वतन्त्र न्यायपालिकायाया लागिं ऐक्यवद्धता जुलुस पिकायेगु निर्णय नं याःगु दु ।

आः दातृ निकायतय्थाय् आन्दोलन
सर्वोच्च अदालतपाखें थ्व फैसला यायेवं म्हिगः उपत्यकाव्यापी सतक विस्तार पीडित संघर्ष समितिया आकस्मिक बैठक च्वनाः आः न्ह्याः वने माःगु थप संघर्षया कार्यक्रम क्वःछिउगु खँ समितिया सल्लाहकार लिसें पत्रकार श्रीकृष्ण महर्जनं ‘नेपालभाषा टाइम्स’ यात कनादिल ।
सरकारं नेपालय् लगानी यायेगु लागिं आह्वान यायेत विश्वया थीथी दातृ निकायतय्गु सम्मेलन येँय् यायेत्यंगु दु ।

थ्वहे इलय् उगु हे सम्मेलनयात लक्षित यासें नेपाःस्थित थीथी दाता देय्तय्गु राजदूतावास व राष्ट्र संघीय दूतावासय् ज्ञापनपत्र बीगु तयारी नं याःगु दु । थ्वहे वइगु चैत्र १२ गते मंगलवाः थीथी दातृ निकायतय्गु ज्याकुथी वनेगु व १३ गते राष्ट्र संघया ज्याकुथी ज्ञापनपौ बिउ वनेगु तयारी
याःगु दु ।

अन बिउ वनीगु ज्ञापनपती नेपालय् मानव अधिकार हनन मजुइक जुइत्यंगु विकास निर्माणया ज्याय् जक लगानी यायेत इनाप याइगु खँ धाःगु दु । अथे हे छुं नं लगानी यायेबलय् स्थानीय प्रभावित जनताया मञ्जुरी व परामर्श कायेमाःगु, सम्पदा व पर्यावरण मस्यनीगु ज्याय् जक लगानी यायेमाःगु, राष्ट्र संघीय निकाय आईएलओया नियम पूवंक पालना याइगु ज्याय् जक लगानी यायेत इनाप याइगु खँ धाःगु दु ।

सरकारं संसदय् हयातःगु राष्ट्रिय गौरवया परियोजना सम्बन्धी विधेयक निरंकूश व जनतामैत्री मजूगुलिं उकियात कार्यान्वयन याये दइ मखु धकाः खबरदारी याःगु दु । उगु विधेयक पारित मयाकेगु लागिं सरकारयात दबाब बीकेत नं अन्तर्राष्ट्रिय समुदाययात पीडित संघर्ष समितिं आह्वान यायेगु निर्णय याःगु दु ।

 

सम्बन्धित बुखँ

LEAVE YOUR COMMENTS