किपू नगरपालिकाया च्याक्वःगु नगरसभा क्वचाल

किपू- किपू नगरपालिकाया च्याक्वःगु नगरसभा आर्थिक, विनियोजन विधेयक, नीतिगत निर्णयया स्वीकृति व थीथी निर्णय यासें क्वचाल । वंगु फागुन १० गतेनिसें शुरु जूगु नगरसभा थीथी निर्णय पारित यासें क्वचाःगु खः ।

नेपाःया राष्ट्रिय गानलिसें शहीदप्रति श्रद्धाञ्जली देछानाः १ गू मिनेट मौनधारण यासें शुरु जूगु नगरसभाया उलेज्या किपू नगरपालिकाया प्रमुख रमेश महर्जनं यानादीगु खः । नगरसभाया निक्वःगु व लिपांगु चरणय् सभाया सचिवलिसें किपू नगरपालिकाया प्रमुख प्रशासकीय अधिकृत सीता परियारं सभाया कार्यसुची प्रस्तुत यासें न्ह्याःगु खः ।

नगरसभाया लिपांगु न्हि किपू नगरपालिकाया उपप्रमुखलिसें विधेयक समितिया संयोजक सरस्वती खड्कां पारित यायेमाःगु ऐन, नियमावली, कानून व नीतिगत निर्णयत स्वीकृतिया निंतिं सभा समक्ष पेश यानादीगु खः ।

अथे हे सुशासन समितिया संयोजक सुनिल डंगोलं सुशासन प्रतिवेदन न्ह्यब्वयादिसें उकियात नगरप्रमुखयात लःल्हानादीगु खः । उगु नगरसभां कर्मचारी विधेयक समायोजन व वन विधेयक नं सर्वसम्मतं पारित याःगु खः ।

दकलय् लिपा सभाध्यक्षलिसें किपू नगरप्रमुख महर्जनं आर्थिक, विनियोजन विधेयक, नीतिगत निर्णय स्वीकृतिया प्रक्रिया व स्वीकृतिया घोषणा यासें नगरसभा क्वचायेकादीगु खः ।