ज्येष्ठ नागरिकयात सम्मान
यल – यल महानगरपालिका १६ वडां जंक्व क्वचाये धुंकूपिं २३८ ज्येष्ठ नागरिकयात विशेष ज्याझ्वःया दथुइ सम्मान याःगु दु । नेवाः परम्पराकथं ७७ दँ, ८२ दँ व ८८ दँय् याइगु जंक्व क्वचायेधुंकूपिं ज्येष्ठ नागरिकयात सम्मान याःगु खः । यल महानगरपालिकाया प्रमुख चिरिबाबु महर्जनं सम्मानित ज्येष्ठ नागरिकयात स्वांमाः क्वखायेकादीगु खःसा वडाअध्यक्ष निर्मलरत्न शाक्यं दोसल्लां न्ययेकादीगु खः ।
सम्मान जुयादीपिंमध्ये स्वक्वः जंक्व पूवनेधुकूपिं ९८ दँया गणेशबहादुर शाक्य व तुलसीबहादुर श्रेष्ठ १०० दँ दुम्ह तुलसी माया श्रेष्ठ, निक्वः जंक्व सिधयेधुंकूम्ह यल मनपाया पुलांम्ह प्रमुखलिसें पुलांम्ह मन्त्री बुद्धिराज वज्राचार्य लगायत खः । ज्याझ्वलय् ज्ञानमाला भजन, धार्मिक पाठ व प्रवचनलिसें अभिमुखीकरण ज्याझ्वःया नं ग्वसाः ग्वःगु खः ।
उगु इलय्भिक्षु कोण्डन्यं शील सदाचारं ज्याथजिथि जुइगु इलय् सुखप्रदायक जुइ धयाबिज्यात । ज्याझ्वःयात ज्येष्ठ नागरिकमैत्री दयेकेगु ल्याखं नांजाःम्ह म्येँ हालामि स्वयम्भू राज शाक्यं बुद्ध भजन, भाष्करवर्ण मिसाप पुचलं ज्ञानमाला भजन न्ह्यब्वःगु खः ।
वडा सदस्य पंचवज्र वज्राचार्यया संयोजकत्वय् जूगु ज्याझ्वलय् प्रा. वज्रराज शाक्य, वडाअध्यक्ष शाक्यं नं नवानादीगु खः । लिसें वइगु दँय् परम्परागत बाजं गुरुपिंत सम्मान यायेगु जानकारी नं बिउगु खःसा छुं दिं न्ह्यः जूगु कला व संस्कृति महोत्सवय् वडाया ज्येष्ठ हस्तकला व्यवसायीपिंत नं सम्मान याःगु खः ।
LEAVE YOUR COMMENTS