रत्नराज्यय् हानं नेपालभाषा

चन्द्रमान वज्राचार्य

आखिर रत्न राज्यलक्ष्मी क्याम्पसय् नेपालभाषा एम.ए. चा हे चाल । थथे धायेमाःगुया कारण थ्व ज्याया सफलता लागिं यक्व यक्व त्याग व परिश्रमया संघर्षया इतिहास दु । ल्याखं ला निदँ स्वदँ न्ह्यः हे थ्व ज्या जुइमाःगु खः, तर बल्ल म्हीग २०७८ कार्तिकया १५ गते तिनि थ्व ज्या जुल, गबले थ्व सम्बन्धी ये“ महानगरपालिकाया सम्पूर्ण प्रक्रिया क्वचाःगु खः । थ्व ज्याया सहजीकरणया लागि थौंयाम्ह रत्न राज्यलक्ष्मी क्याम्पसयाम्ह क्याम्पस प्रमुख जीवनधर ज्ञवाली व वय्कःया टीमयागु यक्व ग्वाहालि दु । न्हापा क्याम्पस प्रशासन हे थ्व ज्याया बाधक जुया बिउगु खः । जब थ्व क्याम्पसय् न्हूम्ह क्याम्पस चीफ ज्ञवालीजु झाल अले थ्व तमाम विध्नबाधा मंत ।

थ्व ज्याय् न्ह्याः वनेत दकलय् तःधंगु साहस व आधार ये“ महानगरपालिकाया मेयर विद्यासुन्दर शाक्यजु यागु वचन खः । वय्कःयागु वचन खः – रत्न राज्यलक्ष्मी क्याम्पसय् नेपालभाषा एम.ए. ब्वंकेत माःगु आर्थिक पक्षया जिम्मेवारी जि दु । माःगु प्रक्रिया न्ह्याकादिस“ ।

थ्वहे कथं क्याम्पसय् प्रमुख व सहायक प्रमुखपिं लिसे ख“ जुल । प्रपोजल च्वयेगु जिम्मेवारी जितः बिल । यक्व मिहेनत यानाः जिं च्वयेगु ज्या सिधयेका । तर ध्यबा माग यायेगु ख“य् क्याम्पस प्रशासन दथुइ यक्व सहलह जुल । थ्व हे सहलहकथं न्याद“या लागि फुक्ककथंया आवश्यकता पूर्तिया लागि स्वंगू करोड चाःचूयागु बजेट उगु प्रपोजलय् न्ह्यथनेमाःगु खः । लिपा थ्व ध्यबा अप्वः जुल, महानगरपालिकापाखें डेढ करोड व शिक्षा मन्त्रालयपाखें नं डेढ करोड तयेकेमाःगु ख“ मेयर शाक्यजुयागु विचार जुल । उकिं शिक्षा मन्त्री कृष्णगोपाल श्रेष्ठजुलिसे सहलह यायेत पि.ए.या लिसे ख“ जुयाः कंसखुन्हु नापलायेगु ई मिले जुल । तर दुःखया ख“, उखुन्हु हे ओली सरकार विघटन जुल । थुकिं हाकनं मेगु समस्या पिदन ।

थुकथं गबलें क्याम्पस प्रमुखपाखें, गबलें कोरोनाया कारणं, गबलें सरकार क्वःदःगु कारणं क्याम्पसय् नेपालभाषा एम.ए ब्वनेगु, ब्वंकेगु ज्या असफल जुयाच्वन । तर नं विद्यार्थीपिं विशेष यानाः नेपालभाषाया विद्यार्थी युनियनया विद्यार्थीपिं अल्सि मचासे थ्वहे ज्याय् ध्यान तयाः धैर्यपूर्वक लगनशील जुयाच्वन । थथे हे क्याम्पस चीफ जीवनधर ज्ञवालीजु नं तसकं चिन्तित जुयाः थःगु ध्यान सक्रियतापूर्वक न्ह्याकाच्वन ।

अन्ततः ये“ महानगरपालिका नेपालभाषा एम.ए ब्वनेगु–ब्वंकेगुया व्यवस्थापनया लागि द“य् भिंmन्यागू लख (१५,००,०००/–) न्याद“तक बीगु खँ क्वःजित । आः थ्वहे निर्णयया आधारय् रत्न राज्यलक्ष्मी क्याम्पसय् सन्ध्याइलय् ३ः३० बजेनिसें नेपालभाषाया एम.ए. ब्वने–ब्वंकेगु चाःगु घोषणा जुल, भर्ना चाल, थ्व हे २२ गते तक डबल दस्तुर पुलाः अथे धइगु दां स्वद्वः (३०००/–) पुलाः थ्वहे २७ गते इन्ट्रान्स जा“च बीगु चाःगु जुल । थ्व ज्याय् फारामया लागिं अनलाइन अथवा क्याम्पसय् हे फारामया व्यवस्था याःगु दु । मेगु नेपालभाषा केन्द्रीय विभाग, यल ध्वाखाय् इन्ट्रान्स जा“च बीपिंसं तप्यंक रत्न राज्यलक्ष्मी क्याम्पसय् सत्तीसा अथवा थःपिन्त अनुकूल जूसा, थन ब्वनेगु इच्छा जूसा याउ“क हे स्वापू तयाः ब्वने फइगु व्यवस्था नं जूगु दु ।

थुकथंया व्यवस्थां आः नेपालभाषा एम.ए ब्वनेगु इच्छा दयाः नं यल ध्वाखा थ्यंक वनेमाःगु तापाःगुया कारणं ब्वने मखनाच्वंपिं सकसियां लागिं वातावरण चूलाःवःगु दु । थ्व कारणं आः विद्यालय लागाय् जक नेपालभाषा ब्वनेगु ब्वंकेगु अवसर दुगु मखुसें विश्वविद्यालय थ्यंक नं थ्व अवसर दयेधुंकूगु दु । थ्व नं झी नेवाःतय्त वःगु न्ह्यथनेबहःगु ऐतिहासिक घटना खः । उकिं थुकिया लागि झी ये“ महानगरपालिकाया मेयर भाजु विद्यासुन्दर शाक्यजुयात यक्व यक्व सुभाय् बी हे माः । क्याम्पस प्रमुख जीवनधर ज्ञवाली व वय्कःया टीमयागु सदिच्छा व ग्वाहालियात नं सुभाय् बी हे माः । अथे हे विद्यार्थीपिं विशेष यानाः रीदेन महर्जन, प्रशान्त डंगोल, रीतेश मल्ल, सृजन श्रेष्ठ, सुरोज तण्डुकार, सुमित रञ्जित, किरण महर्जन, सुनील महर्जन, इन्द्रमान महर्जन, मनीष कुमार श्रेष्ठ, महेश्वर श्रेष्ठ, असोज महर्जन व मेमेपिं ग्वाहालि यानादीपिं सकल विद्यार्थीपिनिगु योगदानयात यक्व यक्व च्वछाये हे माः ।

आः वयाः रत्न राज्यलक्ष्मी क्याम्पस नेपालभाषाया एम.ए चायेकेगु ख“य् छगू जक हे अन्तिम समस्या धइगु विद्यार्थी भर्ना खः । यदि ब्वनीपिं विद्यार्थीपिं हे मन्त अथवा ल्याखं मगात धाःसा गुगु उद्देश्य कयाः थ्व ज्या सफल जूगु खः, थुगु ज्या भताभुङ्ग जुयाः फुक्क मिहेनत, त्याग, बलिदान सित्तिं वनेफु । उकिं थ्व ख“य् वाःचायेकाः विद्यार्थी भर्नाया लागि सकसिनं भिंगु विचारं नुगः चायेकाः नेवाः देय् दबू, हलिं नेवाः गुथि लगायत सलंसः नेवाः संघ–संस्थातय्सं जिम्मेवारीपूर्वक ग्वाहालि यायेमाःगु थ्व झीगु तःधंगु आवश्यकता जुयाच्वंगु दु ।