ने. सं. ११४४ कौलाथ्व पारू - नःलास्वनेगु

ब्रिटिश संग्रहालयय् विश्व नेवाः दिवस

येँ(नेपालभाषा टाइम्स)- वल्र्ड नेवाः अर्गनाइजेसन (डब्लुएनओ)या आह्वानय् दँय्दसं थें थुगुसी नं मार्च महिनाया दकलय् लिपांगु शनिवाःविश्वन्यंकं न्यना वनाच्वंपिं नेवाःतय्सं थःथःगु हे कथं विश्व नेवाः दिवस हन । डब्लुएनओया आह्वानकथं वंगु मार्च २३ शनिवाःकुन्हु खुक्वःगु विश्व नेवाः दिवस हंगु खः ।

अमेरिकाया वाशिंगटन डिसी, बाल्टिमोर, मेरिल्याण्ड, सियाटल, बोस्टन, न्यूयोर्क, शिकागो, पोर्टल्याण्ड लिसें मेमेगु राज्य व सहरय् च्वंपिं नेवाःतय्सं परम्परागत रुपं नेवाः भ्वय्, नेवाः नसा ज्वलं नयेगु, नेवा प्याखं स्वयेगु, नेवाः लोकसंगीतया प्रवद्र्धनया निंतिं थीथी सांस्कृतिक ज्याझ्वः यायेगु, गोष्ठि सहलह आदि ज्याझ्वः यानाः थ्व दिवसयात थःथःगु हे कथं हंगु खः ।

थुकथं हे क्यानाडा, न्युजिल्याण्ड, स्पेन, पोर्चुगल, इजरायल, संयुक्त अरब इमिरेट्स, हङकङ, जर्मन लगायत दर्जनौं देय् च्वंपिंसं नं थीथी ज्याझ्वः यासें थ्व दिवसयात हंगु दुसा येँय् नं वसन्तपुलिइ प्रधानमन्त्री पुष्पकमल दाहालया प्रमुख आतिथ्यताय् विशेष ज्याझ्वः यासें थ्व दिवस हंगु खः । येँ बाहेकं स्वनिगलं पिने द्वाल्खा, चितवन, पोखरा आदि थासय् नं विश्व नेवाः दिवस हंगु दु ।

थुखे बेलायतय् नेवाः मस्तय्त नेवाः कला, संस्कृतिया बारे जानकारी बीगु ल्याखं लन्दनस्थित ब्रिटिश संग्रहालयया भ्रमण याकूगु दु । थ्व छगू अज्याःगु संग्रहालय खः गन, दँय्दसं विश्वया ख्वीगू लख स्वयां अप्वः अवलोकनकर्तात वयेगु याः । थीथी वस्तुया ८० गू लख स्वयां अप्वः अभिलखे व चय्द्वः स्वयां अप्वः थीथी कलाया वस्तु स्वयेत संग्रहालय वयेगु याः ।

थुगु संग्रहालयय् नेपाःया जक नीन्यासः स्वयां अप्वः वस्तु, अभिलेख, सांस्कृतिक, सामाजिक, पुरातात्विक थीथी महत्वया वस्तुत दुगु विश्वास यानातःगु दु । उकीमध्ये २३ गू धातु व ल्वहंया मूर्तित आः नं थन प्रदर्शनय् तयातःगु दु ।

अन्तर्राष्ट्रिय स्तरय् नेपाःया प्रतिनिधित्व याइगु थुपिं दक्वं कलाया वस्तुत स्वनिगःया खयेमाः धकाः डब्लुएनओया नायः संयुक्त श्रेष्ठं कनादीगु दु । डब्लुएनओ युके च्याप्टरं विश्व नेवाः दिवसया लसताय् ग्वसाः ग्वःगु संग्रहालय अवलोकनया इलय् २० म्ह मस्तय् सहभागिता दुगु खः । उगु इलय् मस्तय्त संग्रहालय अवलोकन याकेगु नापं अन्तक्र्रिया नं याःगु खः ।

उगु इलय् नेपाःलिसे जःलाखःला देय् भारत, चीन, तिब्बत, पाकिस्तानलिसेया कलाया सम्बन्ध, बौद्ध कलाकृति व सम्पदा, महापुरुषयात म्हसीकेगु व इमिगु लक्षण आदि बारे केन्द्रीत जुयाः अन्तक्र्रिया याःगु खः ।

डब्लुएनओया नायः श्रेष्ठं ग्वसाः ग्वयादीगु संग्रहालय अवलोकनया इलय् एसओएएस विश्वविद्यालयया वरिष्ठ लेक्चरर डा. स्टेफानी लोटर, युनिभर्सिटी कलेज अफ लन्दनया डा. उमा प्रधान, आर्किटेक्ट भवेश प्रधानं सहजीकरण यानादीगु खः ।