भूमि सम्बन्धी जानकारी बीत मोबाइल एप्स

येँ – सरकारं भूमि सम्बन्धी जानकारी बीगु उद्देश्यं मोबाइल एप्स संचालनय् हःगु दु । कृषि, भूमि व्यवस्था तथा सहकारी मन्त्रालयं ‘भूमि सुशासन’ नांया मोबाइल एप्स प्रयोगय् हःगु खः । एप्सय् मन्त्रालयया भूमिसम्बन्धी सेवाया सकतां जानकारी नापं भूमि सम्बन्धी जुयाच्वंगु व्यवस्था, कानुनया बारे नं जानकारी उपलब्ध जुइगु मन्त्रालयया सहसचिव जनकराज जोशीं कनादिल ।

भूमि नापजांच सम्बन्धी जानकारी नं काये फइगु एप्सय् मालपोत, नापी लगायतया ज्याकुथिइ बीगु निवेदनया ढाँचा नं डाउनलोड याये फइ । खस् व अंग्रेजी निगुलिं भाय् दुथ्याकातःगु एप्सय् भूमि सम्बन्धी पदावलीया अर्थ नं तयातःगु दुसा मालपोत व नापी ज्याकूया थाय्बाय् नं तयातःगु दु ।

अथे हे भूमि सम्बन्धी ज्याकू, अनं उपलब्ध जुइगु थीथीकथंया सेवा, थःत आवश्यक ज्याकू पत्ता लगे यायेगु तरिका, नापी क्यालकुलेटर नं एप्सय् दुथ्याकातःगु दु । ‘नक्सा’ नांया कम्पनीं विकास याःगु एप्सया बारे कम्पनीया संस्थापक उत्तम पुडासैनीं एप्सपाखें मालपोत, नापी व भूमि सुधार ज्याकूया मुख्य सेवाया विवरण आम नागरिकं अःपुक प्राप्त याये फइगु धयादिल ।

‘एप्सय् तयातःगु बडापत्रय् कृषि, भूमि व्यवस्था व सहकारी मन्त्रालयलिसें मन्त्रालय अन्तर्गतया दक्वं विभाग व ज्याकूपाखें प्रदान याइगु सेवा, सेवा कायेत लगे जुइगु दस्तुर, सेवा कायेत आवश्यक भ्वं, सेवा कायेत लगे जुइगु ई व जिम्मेवार अधिकारया विवरण तकं दुथ्याकातःगु दु । एप्सया मेगु विशेषता धइगु देय्या दक्वं प्रदेश व ७५३ गू स्थानीय तहया नक्सा नं स्वये फइगु व्यवस्था दु ।